मुंबई: कोकणच्या लाल मातीची ओढ आणि अरबी समुद्राच्या अथांग लाटा… या दोन्हीचा सुरेख संगम आता ‘रो-रो’ फेरीच्या निमित्ताने पाहायला मिळत आहे. मुंबई शहरामधून बाहेर पडून थेट कोकणच्या निसर्गसौंदर्यात शिरण्यासाठी आता तासनतास घाटमाथ्यावरील ट्रॅफिकमध्ये अडकण्याची गरज उरणार नाही. शिमग्याच्या मुहूर्तावर मुंबई-विजयदुर्ग रो-रो जलवाहतूक सेवेचे रविवारी लोकार्पण झाले आणि कोकणच्या जलप्रवासाचा नवा अध्याय सुरू झाला. भाऊच्या धक्क्यावरून (M2M Ferries) जेव्हा ही धिप्पाड बोट विजयदुर्गच्या दिशेने निघाली, तेव्हा त्या लाटांवर केवळ बोटच नाही, तर हजारो कोकणवासीयांची स्वप्नेही स्वार झाली होती.
मत्स्यव्यवसाय आणि बंदरे मंत्री नितेश राणे यांच्या हस्ते हिरवा झेंडा दाखवून या सेवेचा शुभारंभ करण्यात आला. विशेष म्हणजे, प्रवासाचा श्रीगणेशा करण्यापूर्वी कोकणची संस्कृती जपत भजनी बुवा प्रमोद धुरी यांनी मंत्री राणे यांच्या उपस्थितीत बोटीवर गाऱ्हाणे घातले. “कोकण आणि मुंबईचे नाते हे रक्ताचे आहे आणि आता ते जलमार्गाने अधिक घट्ट होणार आहे,” असा विश्वास यावेळी नितेश राणे यांनी व्यक्त केला. मुख्यमंत्री देवेंद्र फडणवीस यांच्या महत्त्वाकांक्षी सागरी विकास आराखड्याचा हा प्रकल्प एक महत्त्वाचा स्तंभ मानला जात आहे, ज्याचा थेट फायदा कोकणच्या अर्थव्यवस्थेला होणार आहे.
पहिल्याच दिवशी या सेवेला मिळालेला प्रतिसाद थक्क करणारा होता. तब्बल 390 प्रवाशांनी या जलविहाराचा आनंद घेतला. केवळ प्रवासीच नव्हे, तर 21 चारचाकी गाड्या आणि 13 मोटरसायकली पहिल्या फेरीत विजयदुर्गकडे रवाना झाल्या. दुपारी चार वाजून 20 मिनिटांनी जेव्हा ही रो-रो बोट विजयदुर्ग बंदरात दाखल झाली, तेव्हा तेथील ग्रामस्थांनी ढोल-ताशांच्या गजरात तिचे स्वागत केले. सात ते आठ तासांचा हा प्रवास कोणत्याही थकव्याशिवाय पूर्ण झाल्याने प्रवाशांच्या चेहऱ्यावर एक वेगळेच समाधान पाहायला मिळाले.
पहिली M2M रो-रो विजयदुर्गात दाखल.. आज सकाळी मुंबईतील M2M टर्मिनल भाऊचा धक्का येथून निघालेली M2M रो-रो यशस्वीरित्या विजयदुर्ग बंदरात दाखल झाली. जलद, सुरक्षित आणि आरामदायी प्रवासाचा अनुभव घेत कोकण किनारपट्टीचा मनमोहक नजारा पाहत चाकरमानी आणि प्रवासी विजयदुर्ग येथे पोहोचले. यावेळी… pic.twitter.com/bIg8wM8yox — Nitesh Rane (@NiteshNRane) March 1, 2026
या रो-पॅक्स सेवेमुळे केवळ वेळेचीच बचत होणार नाही, तर कोकणातील पर्यटन, मत्स्यव्यवसाय आणि स्थानिक व्यापाराला मोठी उभारी मिळणार आहे. “वाहतुकीचा वेळ आणि श्रम वाचल्यामुळे पर्यटकांचा ओघ वाढेल आणि पर्यायाने स्थानिक तरुणांना रोजगाराच्या नव्या संधी उपलब्ध होतील,” असे मत तज्ज्ञांनी व्यक्त केले आहे. विशेषतः आंबा-काजू उत्पादकांसाठी आपल्या मालाची मुंबईत जलद वाहतूक करण्यासाठी हा मार्ग एक सुवर्णसंधी ठरणार आहे.
मात्र, या सुविधेसोबतच तिकीट दराचा मुद्दाही चर्चिला जात आहे. रस्ते वाहतुकीच्या तुलनेत जलवाहतुकीचे तिकीट काहीसे अधिक असल्याने मध्यमवर्गीय कोकणवासीयांना ही सेवा किती परवडणारी ठरेल, याबाबत प्रश्नचिन्ह उपस्थित केले जात आहेत. ‘वेळ वाचला म्हणजे पैसा वाचला’ असे मानणारा एक वर्ग या सेवेचे स्वागत करत असला, तरी भविष्यात या दरांमध्ये सवलत मिळाल्यास प्रवाशांची संख्या दुपटीने वाढू शकते, असा सूर उमटत आहे.
थोडक्यात सांगायचे तर, कोकणच्या शिमग्यात यंदा रो-रो फेरीचा नवा रंग मिसळला आहे. रस्ते आणि रेल्वेला सक्षम पर्याय म्हणून उभी राहिलेली ही जलवाहतूक सेवा येणाऱ्या काळात ‘कोकणची जीवनवाहिनी’ ठरते की नाही, हे पाहणे औत्सुक्याचे ठरेल. पण सध्या तरी, “चला कोकणात” म्हणणाऱ्या कोकणवासीयांसाठी अरबी समुद्राची सफर एक सुखद अनुभव ठरत आहे.
