जय महाराष्ट्र न्यूज, मुंबई
पश्चिम रेल्वेवर धीम्या मार्गावर 15 डब्यांच्या लोकल संख्येत वाढ करण्याच्या दृष्टीने पूर्वतयारी हाती घेण्यात आली आहे. त्याचा भाग म्हणून अंधेरी ते विरारपर्यंत प्लॅटफॉर्मची लांबी वाढवण्यासाठी निविदा मागवण्यात आल्या आहेत. प्लॅटफॉर्मची लांबी वाढवण्याच्या कामांसाठी 23 कोटींहून जास्त रक्कम अपेक्षित आहे. हा प्रकल्प पूर्ण होण्यासाठी किमान दोन वर्षे लागणार आहेत. पश्चिम रेल्वेवर जलद मार्गावर 15 डब्यांच्या 42 फेऱ्या चालतात.
धीम्या मार्गावर मात्र 15 डब्यांच्या फेऱ्या धावत नाहीत. 15 डब्यांच्या लोकल चालवण्यासाठी प्लॅटफॉर्मची लांबी तितक्या प्रमाणात वाढणे आवश्यक आहे. त्यात अंधेरीपुढील स्थानकांचाही समावेश आहे. चर्चगेट ते मुंबई सेंट्रल या दरम्यानच्या स्थानकांतील प्लॅटफॉर्मची लांबी वाढवणे कठीण आहे. प्लॅटफॉर्मची लांबी वाढवण्याच्या प्रकल्पास केंद्रीय अर्थसंकल्पातही मान्यता मिळाली आहे. अंधेरी ते विरारपर्यंतच्या मार्गावर प्रचंड प्रमाणात गर्दी वाढत आहे. त्यामुळे तिथे शक्य त्या प्रमाणात 15 डब्यांच्या लोकल चालवण्याचा मानस आहे. 15 डब्यांच्या लोकलमुळे प्रवासी क्षमतेत 25 टक्के इतकी वाढ होणार आहे.
