मुंबईच्या सार्वजनिक वाहतूक व्यवस्थेतील महत्त्वाचा भाग असलेल्या मुंबई मेट्रो वनच्या प्रवाशांसाठी महत्त्वाची बातमी आहे. वर्सोवा–अंधेरी–घाटकोपर या मार्गावर गर्दीच्या वेळेत प्रवाशांना अधिक जलद आणि सुलभ सेवा देण्यासाठी मेट्रो वनने आपल्या ट्रेन ऑपरेशनमध्ये बदल करण्याचा निर्णय घेतला आहे. 10 ऑगस्ट 2026 पासून संध्याकाळच्या गर्दीच्या वेळेत ‘मिक्स्ड-लूप’ पद्धतीने मेट्रो सेवा चालवली जाणार आहे. या नव्या व्यवस्थेत प्रत्येक ट्रेन संपूर्ण मार्गावर धावणार नाही. एका ट्रेनची फेरी घाटकोपर ते अंधेरी या मर्यादित अंतरापर्यंत असेल, तर त्यानंतरची ट्रेन नेहमीप्रमाणे घाटकोपर ते वर्सोवा असा पूर्ण प्रवास करेल. प्रवाशांची सर्वाधिक गर्दी असलेल्या अंधेरी–घाटकोपर पट्ट्यात मेट्रोची उपलब्धता वाढवणे हा या बदलामागचा प्रमुख उद्देश आहे.
अंधेरी–घाटकोपर प्रवास आणखी वेगवान होणार
सध्याच्या वेळापत्रकानुसार अंधेरी आणि घाटकोपरदरम्यान गर्दीच्या वेळेत दोन मेट्रोमधील अंतर सुमारे 3 मिनिटे 20 सेकंद आहे. नव्या ऑपरेशननंतर हे अंतर 3 मिनिटांपर्यंत कमी होणार आहे. यामुळे प्रवाशांना मेट्रोसाठी कमी वेळ प्रतीक्षा करावी लागेल. तसेच सर्वाधिक गर्दी असलेल्या या मार्गावर प्रवासी वाहून नेण्याची क्षमता 20 टक्क्यांहून अधिक वाढणार आहे. परिणामी सुमारे 28 हजार अतिरिक्त प्रवाशांना वाहतूक सुविधा उपलब्ध होण्याची शक्यता आहे.
हेही वाचा – Mumbai local: प्रवाशांनो, रविवारी लोकलच्या तिन्ही मार्गांवर मेगाब्लॉक; वेळापत्रक पाहूनच प्रवासाचे नियोजन करा
मेट्रोच्या फेऱ्यांमध्येही वाढ
नवीन नियोजनामुळे कामकाजाच्या दिवसांत धावणाऱ्या मेट्रोच्या एकूण फेऱ्यांमध्ये वाढ करण्यात आली आहे. सध्या दररोज 476 फेऱ्या होत असताना आता ही संख्या 484 फेऱ्यांपर्यंत वाढणार आहे. दरम्यान, वर्सोवा ते आझाद नगर या मार्गावर गर्दीच्या वेळेत मेट्रो ट्रेनचे अंतर 362 सेकंद राहणार आहे.
संध्याकाळी शॉर्ट-लूप ट्रेनची सेवा
नव्या वेळापत्रकानुसार अंधेरीच्या डाउन प्लॅटफॉर्मवरून पहिली शॉर्ट-लूप ट्रेन सायंकाळी 6 वाजून 23 मिनिटे 06 सेकंदांनी रवाना होईल. या प्रकारातील शेवटची ट्रेन रात्री 8 वाजून 23 मिनिटे 46 सेकंदांनी सुटणार आहे. या बदलाचा सर्वाधिक फायदा अंधेरी आणि घाटकोपरदरम्यान प्रवास करणाऱ्या प्रवाशांना होण्याची शक्यता आहे. मेट्रो वनच्या माहितीनुसार या मार्गावर प्रवास करणाऱ्या 85 टक्क्यांहून अधिक प्रवाशांना सुधारित सेवेचा फायदा मिळेल.
प्रवाशांना काय फायदा होणार?
नव्या मिक्स्ड-लूप व्यवस्थेमुळे मेट्रोची वारंवारिता वाढणार आहे. त्यामुळे ट्रेनसाठी लागणारा प्रतीक्षा कालावधी कमी होईल. अंधेरी–घाटकोपर या सर्वाधिक गर्दीच्या भागात अतिरिक्त प्रवासी वाहतूक क्षमता उपलब्ध होणार असून, गर्दीच्या वेळेत प्रवास अधिक सुरळीत होण्यास मदत मिळणार आहे.
मेट्रो वनच्या CEO यांची माहिती
मुंबई मेट्रो वनचे मुख्य कार्यकारी अधिकारी श्यामंतक चौधरी यांनी सांगितले की, उपलब्ध पायाभूत सुविधांचा अधिक चांगल्या पद्धतीने वापर करण्यासाठी मिक्स्ड-लूप ऑपरेशन सुरू करण्यात येत आहे. गर्दीच्या वेळेत ट्रेनचे संचालन अधिक प्रभावी करून प्रवाशांचा प्रतीक्षा कालावधी कमी करणे आणि प्रवासी वाहून नेण्याची क्षमता वाढवणे, हा या निर्णयाचा मुख्य उद्देश आहे. मुंबई मेट्रो वनकडून प्रवाशांच्या प्रवासाच्या पद्धती आणि गर्दीच्या स्वरूपाचा नियमित अभ्यास केला जातो. त्यानुसार सेवा अधिक कार्यक्षम करण्यासाठी विविध उपाययोजना आणि कार्यपद्धतीतील बदल केले जातात. सुरक्षितता आणि विश्वासार्हतेला प्राधान्य देत प्रवाशांना अधिक जलद आणि सोयीस्कर सेवा देण्याचा प्रयत्न मेट्रो प्रशासनाकडून सुरू आहे.
