मुंबई : महाराष्ट्र राज्य परिवहन महामंडळाने (एमएसआरटीसी) प्रवाशांच्या सोयीसाठी तंत्रज्ञानाचा मोठा वापर करत नवीन अॅप तयार केले आहे, ज्यामुळे एसटी प्रवास अधिक सोपा, सुरक्षित, आणि प्रवासीपूरक होणार आहे. ‘एमएसआरटीसी कम्युटर अॅप’ नावाचे हे अॅप लवकरच उपलब्ध होईल आणि नोव्हेंबरपासून कार्यान्वित होण्याची अपेक्षा आहे.
काय आहे ‘एमएसआरटीसी कम्युटर अॅप’?
हे अॅप प्रवाशांना एसटी सेवांशी संबंधित सर्व महत्त्वाची माहिती एका क्लिकवर देणार आहे. जसे की एसटी गाड्यांचे रिझर्व्हेशन, चालू असलेल्या गाडीचे ठिकाण, वेळापत्रक, मार्ग, तसेच अपघात किंवा आणीबाणीच्या परिस्थितीत मदतीसाठी तत्काळ संपर्काची सुविधा. हे अॅप मराठी आणि इंग्रजी भाषेत उपलब्ध असेल, त्यामुळे सर्वसामान्य प्रवाशांसाठी उपयोगी ठरेल.
अॅपमधील सुविधा:
तिकीट आरक्षण: प्रवासी आता तिकीट सहज ऑनलाइन बुक करू शकतील.
लोकेशन ट्रॅकिंग: गाडी सध्या कुठे आहे आणि किती वेळ लागेल, हे समजेल.
महिला सुरक्षा: महिला प्रवाशांसाठी विशेष सुरक्षा सुविधा समाविष्ट.
आणीबाणी मदत: एसटी नियंत्रण कक्ष, पोलिस, रुग्णवाहिका यांना थेट संपर्क साधता येईल.
तांत्रिक बिघाड व वैद्यकीय मदत: गाडीत तांत्रिक बिघाड झाल्यास किंवा वैद्यकीय आपत्कालीन परिस्थितीत तत्काळ मदत मिळवता येईल.
आधुनिक तंत्रज्ञानामुळे होणारे फायदे
एसटी सेवांमध्ये प्रवाशांना अधिकाधिक सुविधा मिळवून देण्यासाठी हा प्रकल्प राबवला जात आहे. अॅपमुळे एसटी प्रवास आता अधिक सोयीस्कर आणि विश्वासार्ह होईल. प्रवाशांना एसटीचा नेमका ठावठिकाणा समजण्यासाठी हे अॅप महत्त्वपूर्ण ठरणार आहे.
अद्याप अॅप कार्यान्वित होण्यासाठी थोडा वेळ लागणार असला, तरी प्रवाशांच्या गरजा लक्षात घेऊन करण्यात आलेला हा बदल खरोखर प्रशंसनीय आहे. लालपरी आता खऱ्या अर्थाने प्रवाशांच्या सेवेसाठी डिजिटल होणार आहे.
जय महाराष्ट्र न्यूजच्या थेट संपर्कात राहण्यासाठी व्हॉट्सअप चॅनेल वर क्लिक करा.
