ठाणे : गणपती विसर्जनाच्या चार महत्त्वाच्या दिवशी डोंबिवलीतील मोठागाव येथील माणकोली उड्डाणपूल दुपारी 12 ते मध्यरात्रीपर्यंत बंद ठेवण्याची घोषणा वाहतूक विभागाने केली आहे. या काळात वाहतूक पर्यायी मार्गांनी वळवली जाईल, अशी माहिती डोंबिवली वाहतूक विभागाचे वरिष्ठ पोलीस निरीक्षक श्रीराम पाटील यांनी दिली. वाहतूक विभागाचे उपायुक्त पंकज शिरसाट यांनी अधिकृत अधिसूचना जारी केली. त्यानुसार, 28 ऑगस्ट, 31 ऑगस्ट, 2 सप्टेंबर आणि 6 सप्टेंबर रोजी पूल वाहतुकीसाठी बंद राहणार आहेत.
डोंबिवलीतील गणेशभक्त गेल्या अनेक वर्षांपासून मोठागाव रेतीबंदर खाडीवरील गणेश घाट विसर्जनासाठी निवडत आहेत. दीड दिवस, पाच दिवस, सात दिवस आणि विशेषतः अनंत चतुर्दशीला गणपती आणि गौरी विसर्जनासाठी या घाटावर मोठ्या संख्येने भाविक जमतात. डोंबिवली शहरातील अनेक भाविक रेतीबंदर चौक रोड, रेतीबंदर रेल्वे गेट मार्गे मोठागाव मानकोली उड्डाणपुलाकडे पायी आणि वाहनाने विसर्जनासाठी जातात. माणकोली उड्डाणपूल सुरू झाल्यापासून, ठाणे, मुंबई आणि भिवंडी येथील प्रवाशांसाठी हा एक पसंतीचा मध्यवर्ती मार्ग बनला आहे. या भागातून नियमित वाहतुकीमुळे रेतीबंदर रेल्वे गेट, उमेशनगर, पंडित दीनदयाळ रोड आणि माणकोली उड्डाणपूल पुलावरील गर्दीत भर पडते.
हेही वाचा : Hartalika Tritiya 2025: हरतालिकेच्या कथेला विशेष महत्त्व, जाणून घ्या..
गणपती विसर्जनादरम्यान गर्दी आणि वाहनांची संख्या वाढण्याची शक्यता असल्याने, गंभीर वाहतूक कोंडी होण्याचा धोका जास्त आहे. हे टाळण्यासाठी, वाहतूक विभागाने वरील तारखांना उड्डाणपूल बंद करण्याचा निर्णय घेतला आहे. ठाणे, मुंबईहून येणारी वाहने माणकोली उड्डाणपुलावरून: अंजूर दिवेगाव, लोढा धाम, माणकोली (मुंबई-नाशिक महामार्गाजवळील नारपोली वाहतूक मर्यादेत) येथे प्रतिबंधित असतील. या वाहनांना अंजूरफाटा, भिवंडी बायपास रोडने पुढे जावे लागेल. कल्याण, अंबरनाथ, बदलापूर, नवी मुंबईहून येणारी वाहने पत्री पूल, टाटा नाका, सुयोग हॉटेल, डीएनएस बँक सोनारपाडा, मानपाडा चौक, घरडा सर्कल येथे प्रतिबंधित असतील. या वाहनांनी दुर्गाडी आणि गांधार पूल मार्गाने जावे, असे आवाहन करण्यात आले आहे.
ठाकुर्ली, डोंबिवलीहून येणारी वाहने ठाकुर्ली किंवा कोपर पूलमार्गे कोपर पूल आणि ठाकुर्ली पूल येथे प्रवेश प्रतिबंधित असेल. दुर्गाडी पूल आणि गांधार पूलमार्गे पर्यायी मार्ग वापरावा. डोंबिवलीहून येणारी वाहने मोठागाव रेतीबंदर रेल्वे गेटवरून: मोठागाव मानकोली येथे थांबविली जातील. पत्रीपूल आणि दुर्गाडी चौकमार्गे पर्यायी मार्ग वापरावा, अशा सूचना करण्यात आल्या आहेत.
