कोरोनाच्या दुसऱ्या लाटेनंतर राज्यात आजपासून मुंबई, ठाण्यासह बहुतांश भागांतील जनजीवन हळूहळू पूर्वपदावर येणार आहे. दुसऱ्या स्तरात असणाऱ्या ठाणे शहरातील दुकाने दिवसभर खुली राहणार असून, तिसऱ्या स्तरात असलेल्या मुंबईत दुकानांना ४ वाजेपर्यंत मुभा असणार आहे.
निर्बंध शिथिल करताना मुंबई, नागपूर, पुणे, ठाणे, नाशिक, पिंपरी-चिंचवड, औरंगाबाद, वसई-विरार, नवी मुंबई, नागपूर, सोलापूर, कल्याण-डोंबिवली महानगरपालिका यांना वेगळे प्रशासकीय घटक म्हणून जाहीर करण्यात आले आहेत.
मुंबई,पुणे, नाशिक, वसई-विरार आणि कल्याण-डोंबिवली महापालिका क्षेत्र तिसऱ्या टप्प्यात येत असल्याने अत्यावश्यक सेवेतील आणि इतर दुकाने सकाळी ७ ते सायंकाळी ४ पर्यंत खुली राहतील. अत्यावश्यक दुकाने वगळता अन्य दुकाने शनिवार-रविवार बंद राहतील. त्याचप्रमाणे उपाहारगृहे ५० टक्के क्षमतेने सकाळी ७ ते ४ वाजेपर्यंत सुरू राहतील, मॉल्स, नाटय़गृहे बंदच राहणार आहेत.
खासगी कार्यालये संध्याकाळी ४ वाजेपर्यंत ५० टक्के उपस्थितीत सुरू राहतील. सांस्कृतिक आणि सामाजिक कार्यक्रम क्षमतेच्या ५० टक्के मर्यादेत सकाळी ७ ते ४ वाजेपर्यंत सोमवार ते शुक्रवार परवानगी असेल. त्याचप्रमाणे लग्नसोहळ्यांना ५० लोकांच्या उपस्थितीस परवानगी आहे, तर अंत्यसंस्कारासाठी २० लोक उपस्थित राहू शकतील. व्यायामशाळा, केशकर्तनालय पूर्वनोंदणी करून ५० टक्के क्षमतेने संध्याकाळी ४ वाजेपर्यंत सुरू ठेवता येतील. सार्वजनिक वाहतूक पूर्ण क्षमतेने सुरू राहील.
तसेच चौथ्या टप्प्यात असणाऱ्या पुणे, बुलढाणा, कोल्हापूर, रायगड, रत्नागिरी, सांगली, सातारा, सिंधुदुर्ग या जिल्ह्यांमधील अत्यावश्यक दुकाने संध्याकाळी ४ वाजेपर्यंत सुरू राहतील.
