मुंबई: उन्हाचा तडाखा वाढत असतानाच आता राज्यातील लाखो विद्यार्थ्यांच्या आणि पालकांच्या काळजाचा ठोका चुकवणारी एक बातमी समोर येत आहे. दरवर्षी मे महिन्याची चाहूल लागली की, दहावी-बारावीच्या निकालाचे वेध सर्वांनाच लागतात. यंदाही मे महिन्याच्या पहिल्या आठवड्यात बारावीचा निकाल जाहीर होईल, अशी दाट शक्यता वर्तवण्यात आली होती. मात्र, आता राज्य माध्यमिक व उच्च माध्यमिक शिक्षण मंडळाच्या कर्मचाऱ्यांनी पुकारलेल्या आंदोलनामुळे या निकालासाठी 'ब्रेक' लागण्याची चिन्हे दिसत आहेत. प्रशासकीय धोरणांच्या कात्रीत यंदा विद्यार्थ्यांचा निकाल आणि पर्यायाने पुढील प्रवेश प्रक्रिया अडकण्याची भीती निर्माण झाली आहे.
या संपूर्ण गोंधळाचे मूळ कारण बोर्डाच्या कर्मचाऱ्यांच्या प्रलंबित मागण्या आणि प्रशासनाचा एकतर्फी निर्णय असल्याचे सांगितले जात आहे. शिक्षण मंडळाने कर्मचाऱ्यांची बढती आणि बदलीचा कालावधी दोन वर्षांवरून थेट चार ते सहा वर्षांवर नेल्याने कर्मचाऱ्यांमध्ये तीव्र संतापाची लाट उसळली आहे. "राज्य शिक्षण कर्मचारी संघटनेला विश्वासात न घेता घेतलेला हा निर्णय अन्यायकारक आहे," असा पवित्रा घेत कर्मचारी महासंघाने 28 एप्रिल 2026 पासून अधिकृतपणे 'कामबंद' आंदोलनाचा इशारा दिला आहे. यामुळे निकालाच्या अंतिम टप्प्यातील तांत्रिक कामे आता अधांतरी पडली आहेत.
सध्या राज्यातील नऊही विभागीय मंडळांमध्ये लाक्षणिक कामबंद आंदोलन सुरू असून, त्याचा थेट परिणाम उत्तरपत्रिकांच्या संकलनावर आणि संगणकीय प्रक्रियेवर होत आहे. बोर्ड कर्मचारी महासंघाचे उपाध्यक्ष विठ्ठल सरोदे यांनी दिलेल्या माहितीनुसार, जर कर्मचाऱ्यांच्या मागण्या मान्य झाल्या नाहीत, तर निकालाचे काम पूर्णपणे ठप्प होऊ शकते. निकालासाठी आवश्यक असलेले सॉफ्टवेअर अपडेट्स, गुणतालिकेची तपासणी आणि निकालाची अंतिम पडताळणी ही कामे कर्मचाऱ्यांशिवाय पूर्ण होणे अशक्य असल्याने, मे महिन्याचे वेळापत्रक कोलमडणार हे निश्चित मानले जात आहे.
दहावी आणि बारावीच्या निकालावर केवळ शालेय शिक्षणच नाही, तर महाविद्यालयीन प्रवेशाचे संपूर्ण गणित अवलंबून असते. व्यावसायिक अभ्यासक्रम, इंजिनिअरिंग, मेडिकल आणि इतर पदवी प्रवेशांच्या तारखा निकालाच्या तारखेवर आधारित असतात. जर निकाल लांबणीवर गेला, तर या सर्व प्रक्रियांना विलंब होईल, ज्याचा मानसिक ताण विद्यार्थ्यांना सहन करावा लागेल. निकालाची टांगती तलवार असल्याने या संकटात सध्या विद्यार्थी सापडले आहेत.
आतापर्यंत राज्य मंडळाकडून निकालाच्या कोणत्याही अधिकृत तारखेची घोषणा करण्यात आलेली नाही. सहसा निकाल जाहीर होण्याच्या दोन-तीन दिवस आधी अधिकृत पत्रक काढले जाते. मात्र, कर्मचाऱ्यांच्या या आक्रमक भूमिकेमुळे बोर्डाचे वरिष्ठ अधिकारीही सध्या सावध पवित्रा घेत आहेत. 28 एप्रिल 2026 पूर्वी सरकार आणि कर्मचारी संघटना यांच्यात तोडगा निघाला नाही, तर मात्र निकालाची प्रतीक्षा अधिक लांबण्याची शक्यता आहे.
एकूणच, प्रशासकीय हट्ट आणि कर्मचाऱ्यांचे हक्क यांच्या लढाईत विद्यार्थ्यांचे शैक्षणिक नुकसान होऊ नये, हीच अपेक्षा व्यक्त केली जात आहे. आगामी दोन दिवस निकालाच्या दृष्टीने अत्यंत निर्णायक ठरणार असून, शासन यावर काय तोडगा काढते हेही तितकेच महत्त्वाचे ठरणार आहे.
