मंगळुरू: मध्यपूर्वेत सुरू असलेल्या युद्धामुळे आशियातील अनेक देशांना तेल आणि एलपीजी गॅसच्या तुटवड्याचा सामना करावा लागत आहे. या पार्श्वभूमीवर भारतातही एलपीजीच्या उपलब्धतेबाबत चिंता व्यक्त केली जात होती. मात्र या परिस्थितीत दिलासा देणारी बातमी समोर आली असून एलपीजीने भरलेले एक जहाज रविवारी भारतात दाखल झाले आहे. यामुळे आगामी काही दिवसांत देशातील गॅस पुरवठा काही प्रमाणात स्थिर होण्याची शक्यता व्यक्त केली जात आहे.
वृत्तानुसार, पायक्सिस पायनियर नावाचे जहाज रविवारी न्यू मंगळुरू बंदरावर पोहोचले. या जहाजात सुमारे 16,714 टन एलपीजी गॅस लोड करण्यात आला होता. सिंगापूरचा ध्वज असलेले हे जहाज नेदरलँडमधील बंदरातून 14 फेब्रुवारीला रवाना झाले होते. या जहाजावरील एलपीजी एजिस लॉजिस्टिक्स लिमिटेडसाठी उतरवण्यात येणार असून माल उतरवल्यानंतर हे जहाज पुन्हा पुढील प्रवासासाठी रवाना होणार आहे.
माहितीनुसार, पुढील आठवड्यात न्यू मंगळुरू बंदरावर एकूण सुमारे 72,700 टन एलपीजी पोहोचण्याची शक्यता आहे. त्यामुळे देशातील गॅसचा तुटवडा कमी होण्यास मदत होईल, असा अंदाज व्यक्त केला जात आहे. या प्रक्रियेची सुरुवात आधीच झाली असून जगातील विविध भागांतून एलपीजीने भरलेली जहाजे भारताकडे येत आहेत.
याशिवाय 25 मार्च रोजी अपोलो ओशन नावाचा आणखी एक टँकर बंदरावर दाखल होणार आहे. या जहाजामध्ये सुमारे 26,687 टन एलपीजी असेल. हा गॅस इंडियन ऑइल कॉर्पोरेशन लिमिटेड आणि भारत पेट्रोलियम कॉर्पोरेशन लिमिटेड यांच्यासाठी उतरवण्यात येणार आहे. व्हिएतनामचा ध्वज असलेले हे जहाज गुजरातमधील वाडीनार बंदरावरून मंगळुरूकडे येणार असल्याची माहिती देण्यात आली आहे.
दरम्यान, 29 मार्च रोजी अमेरिकेतून सुमारे 30,000 टन एलपीजी घेऊन आणखी एक टँकर भारतात पोहोचणार आहे. ही गॅससेवा हिंदुस्तान पेट्रोलियम कॉर्पोरेशन लिमिटेडसाठी असणार आहे. मंगळुरू येथील एचपीसीएलच्या एलपीजी प्रकल्पातून हा गॅस स्थानिक बॉटलिंग प्रकल्पांकडे तसेच पाइपलाइनच्या माध्यमातून बेंगळुरूसह इतर शहरांकडे पाठवला जातो.
एकूणच, न्यू मंगळुरू बंदरावर येत्या काही दिवसांत एलपीजीची मोठी खेप पोहोचणार असल्याने देशातील गॅस पुरवठा अधिक चांगला होण्याची अपेक्षा व्यक्त केली जात आहे. मध्यपूर्वेतील तणावाच्या पार्श्वभूमीवर ही घडामोड भारतासाठी मोठा दिलासा ठरणारी मानली जात आहे.
