मुंबई : लोणावळा–कर्जत तिसरी मार्गिका 31 जुलैपर्यंत सुरू होणार असल्याची माहिती समोर येत आहे. लोणावळा–कर्जत घाट विभागातील भूस्खलनामुळे बाधित झालेल्या तिसऱ्या (अप) मार्गिकेचे पुनर्बांधणीचे काम युद्धपातळीवर सुरू असून 31 जुलैपर्यंत तिसरी मार्गिका वाहतुकीसाठी सुरू करण्याचे मध्य रेल्वेचे लक्ष्य आहे. सुरक्षिततेला सर्वोच्च प्राधान्य देत रेल्वे अभियंते, तांत्रिक कर्मचारी आणि कंत्राटी यंत्रणा 24 तास काम करत आहेत, अशी माहिती मध्य रेल्वेने दिली आहे. उताराच्या वरच्या भागातून एकाच वेळी पुनर्बांधणीचे काम सुरू असून भूस्खलनग्रस्त ठिकाणी पोहोचण्यासाठी तयार केलेल्या तात्पुरत्या प्रवेशमार्गांची दुरुस्ती व मजबुतीकरणाचे काम पूर्ण झाले आहे. त्यामुळे दररोज 50 ते 60 डंपर ग्रॅन्युलर साहित्य थेट उताराच्या पायथ्यापर्यंत पोहोचवले जात आहे. तसेच रेल्वे प्रशासनाकडून उताराची स्थिरता, मातीचा भराव आणि सुरक्षिततेची प्रत्येक टप्प्यावर तपासणी केली जात आहे.
भूस्खलन, दरडी कोसळणे किंवा इतर आपत्कालीन परिस्थितींमुळे रेल्वेगाड्यांमध्ये अडकलेल्या प्रवाशांना सुरक्षित बाहेर काढण्यासाठी, मध्य रेल्वे कर्जत-लोणावळा घाट मार्गालगत 26 किमी लांबीचा आपत्कालीन रस्ता बांधण्याचे नियोजन करत आहे. या महिन्याच्या सुरुवातीला मुसळधार पावसामुळे घाट भागात अनेक ठिकाणी दरडी कोसळल्याने मुंबई-पुणे या वर्दळीच्या मार्गावरील रेल्वे सेवा जवळपास आठवडाभर विस्कळीत झाली होती. या घटनेमुळे दुर्गम भागात अडकलेल्या गाड्यांपर्यंत पोहोचण्यासाठी रस्त्याची सुविधा नसल्याची बाब प्रकर्षाने समोर आली आणि त्यानंतरच हा प्रस्ताव मांडण्यात आला आहे.
कर्जत आणि लोणावळा दरम्यान रेल्वे रुळांलगत प्रस्तावित असलेल्या या रस्त्यामुळे बस आणि आपत्कालीन वाहनांना अडकलेल्या गाड्यांपर्यंत पोहोचणे आणि प्रवाशांना जवळच्या सुरक्षित ठिकाणांपर्यंत हलवणे शक्य होईल. तसेच, यामुळे पिण्याचे पाणी, अन्न, औषधे आणि इतर मदत साहित्य पोहोचवणे सोपे होईल, तसेच तातडीची वैद्यकीय मदत आवश्यक असलेल्या प्रवाशांपर्यंत रुग्णवाहिका आणि वैद्यकीय पथके पोहोचू शकतील. 6 जुलै रोजी झालेल्या दरडी कोसळण्याच्या घटनांमुळे घाट भागातील तिन्ही रेल्वे मार्ग बाधित झाले होते आणि रेल्वे सेवा ठप्प झाली होती. मध्य रेल्वेने 48 तासांच्या आत पहिला मार्ग पूर्ववत केला, ज्यामुळे वेगावर निर्बंध घालून मर्यादित स्वरूपात रेल्वे वाहतूक सुरू करणे शक्य झाले. दुसरा मार्ग 15 जुलै रोजी पुन्हा सुरू करण्यात आला, तर तिसऱ्या मार्गाचे दुरुस्तीचे काम अद्याप सुरू आहे.
