घरातील लिव्हिंग रूम ही सर्वात जास्त वापरली जाणारी जागा मानली जाते. कुटुंबासोबत वेळ घालवणे, पाहुण्यांचे स्वागत करणे किंवा मित्र-मैत्रिणींसोबत निवांत गप्पा मारणे या सगळ्या गोष्टींसाठी हीच जागा वापरली जाते. त्यामुळे लिव्हिंग रूम जितकी आरामदायी आणि आकर्षक दिसेल तितके संपूर्ण घर अधिक सुंदर आणि स्टायलिश वाटते. थोड्या स्मार्ट डेकोरेशनच्या मदतीने अगदी छोट्या लिव्हिंग रूमलाही आकर्षक रूप देता येते.
लिव्हिंग रूम अनेक गरजा पूर्ण करत असल्याने काही काळानंतर ती एकसुरी किंवा कंटाळवाणी वाटू शकते. मात्र घर सजावटीतील नवीन ट्रेंड लक्षात घेऊन काही साध्या बदलांनी खोलीला ताजेतवाने आणि आधुनिक लुक देता येतो. योग्य रंग, फर्निचर आणि सजावटीच्या वस्तूंचा विचारपूर्वक वापर केल्यास जागेचा संपूर्ण माहोल बदलू शकतो.
लिव्हिंग रूम सजवताना सर्वप्रथम रंगांची योग्य निवड करणे अत्यंत महत्त्वाचे असते. रंग कोणत्याही जागेचे वातावरण बदलण्यात मोठी भूमिका बजावतात. ऑफ-पेस्टल, पांढरा किंवा बेजसारखे क्लासिक रंग वापरल्यास खोलीला स्वच्छ आणि एलिगंट लुक मिळतो. त्याचबरोबर ऑलिव्ह ग्रीन, डार्क ब्राउन, नेव्ही ब्लू किंवा मरूनसारखे ट्रेंडी रंगही भिंतींवर वापरल्यास लिव्हिंग रूम अधिक आकर्षक दिसू शकते.
जागेचा योग्य वापर करण्यासाठी मल्टीपर्पज फर्निचरची निवड करणेही फायदेशीर ठरते. जड आणि मोठ्या फर्निचरऐवजी स्टोरेज असलेला सोफा, ड्रॉवर असलेली सेंटर टेबल किंवा पुस्तकांसाठी शेल्फ असलेले टेबल वापरल्यास जागा वाचते आणि उपयोगिताही वाढते. तसेच काही जुन्या किंवा अँटिक सजावटीच्या वस्तू वापरल्यास खोलीला वेगळा आणि आकर्षक विंटेज लुक मिळू शकतो.
खोलीला अधिक प्रशस्त आणि उजळ दाखवण्यासाठी भिंतीवर मोठे आरसे लावणेही उपयुक्त ठरते. आरसे प्रकाश परावर्तित करतात, त्यामुळे खोली अधिक मोठी आणि उजळ दिसते. विशेषतः दरवाज्याजवळ किंवा नैसर्गिक प्रकाश येणाऱ्या ठिकाणी आरसा लावल्यास संपूर्ण खोलीत प्रकाश पसरतो आणि वातावरण अधिक प्रसन्न वाटते.
घराच्या आत हिरव्या वनस्पती ठेवणे हीदेखील लिव्हिंग रूम सजावटीची एक सुंदर कल्पना आहे. अनेकदा लोक झाडे घराबाहेर ठेवतात, पण लिव्हिंग रूममध्ये काही छोटे कुंडीतले रोप ठेवले तर खोलीचा माहोल लगेच बदलतो. स्नेक प्लांट, रबर प्लांट, सक्युलेंट्स किंवा अरेका पाम यांसारखी रोपे घरात सहज वाढतात आणि त्यांची देखभालही सोपी असते.
लिव्हिंग रूम सजवताना पडदे आणि कार्पेट निवडतानाही काळजी घेणे आवश्यक आहे. जाड आणि जड कपड्यांऐवजी हलके, हवादार आणि प्रकाश आत येऊ देणारे पडदे वापरल्यास खोली अधिक खुली आणि प्रसन्न वाटते. लांब पडदे वापरल्यास खोलीला एलिगंट लुक मिळतो आणि नैसर्गिक प्रकाशही सहजपणे आत येतो. योग्य नियोजन आणि छोट्या बदलांमुळे लिव्हिंग रूम अधिक स्टायलिश आणि आरामदायी बनवता येते.
