मुंबई, २ जून २०२३, प्रतिनिधी : मुंबईत मुंबईत दरवर्षी पावसाळ्यात घरांची, इमारतींची पडझड होत असते. यात निष्पाप नागरिकांचाही बळी जात असतो. मात्र, यंदा पावसाळा सुरू होण्याआधीच म्हाडाने उपाययोजना सुरू केल्या आहे. म्हाडाने मुंबईतील अतिधोकादायक १५ इमारतींची यादी जाहीर केली आहे.
मुंबई इमारत दुरुस्ती व पुनर्रचना मंडळाकडून म्हाडाने इमारतींचे पावसाळापूर्व सर्वेक्षण पूर्ण केले आहे. त्यानंतर १५ अतिधोकादायक इमारतींची यादी जाहीर करण्यात आली आहे. धक्कादायक म्हणजे यादीत गेल्या वर्षी अतिधोकादायक म्हणून घोषित केलेल्या ७ इमारतींचा समावेश आहे. यादीतील सर्व इमारती उपकरप्राप्त असून त्यात ४२४ निवासी व १२१ अनिवासी असे एकूण ५४५ सदनिका आहेत. इमारती रिक्त करण्याकामी सहकार्य करावे, असे आवाहन अतिधोकादायक इमारतींतील रहिवाशाना मंडळातर्फे करण्यात आले आहे.
अतिधोकादायक इमारतीमधील २२२ रहिवाशांची संक्रमण शिबिरात व्यवस्था करावी लागणार असल्याची माहिती मंडळातर्फे देण्यात आली आहे. त्यादृष्टीने मंडळाकडून नियोजन देखील करण्यात आले आहे. नागरिकांनी सुरक्षिततेसाठी मंडळाच्या अधिकाऱ्यांनी दिलेल्या सूचनांचे पालन करावे. मंडळाचे नियंत्रण कक्ष अहोरात्र कार्यरत आहेत. इमारतीमध्ये कोणतीही धोक्याची लक्षणे आढळून आल्यास नियंत्रण कक्षाशी संपर्क साधावा. जेणे करून जीवित आणि वित्तहानी टाळता येईल, असे देखील मंडळातर्फे सांगण्यात येत आहे.
१५ अतिधोकादायक इमारतींची यादी पुढीलप्रमाणे :
1) इमारत क्रमांक ४-४ ए,नवरोजी हिल रोड क्र. 1, जॉली चेंबर (मागील वर्षीच्या यादीतील)
2) इमारत क्रमांक ७४ निझाम स्ट्रीट (मागील वर्षीच्या यादीतील)
3) इमारत क्रमांक ४२, मस्जिद स्ट्रीट (मागील वर्षीच्या यादीतील)
4) इमारत क्रमांक ६१-६१ए , मस्जिद स्ट्रीट
5) इमारत क्रमांक २१२ जे पांजरपोळ लेन
6) इमारत क्रमांक १७३-१७५-१७९ व्ही के बिल्डिंग, प्रिन्सेस स्ट्रीट, काळबादेवी
7) इमारत क्रमांक २-४-६ नानुभाई देसाई रोड, मुंबई
8) इमारत क्रमांक १-२३ नानुभाई देसाई रोड, मुंबई
9) इमारत क्रमांक ३५१ ए, जे एस एस रोड मुंबई
10) इमारत क्रमांक ३८७-३९१ बदामवाडी, व्ही .पी. रोड (मागील वर्षीच्या यादीतील)
11) इमारत क्रमांक १७ नारायण निवास , निकटवाडी
12) इमारत क्रमांक ३१सी व ३३ए ,आर रांगणेकर मार्ग व १९ पुरंदरे मार्ग, गिरगावचौपाटी (मागील वर्षीच्या यादीतील)
13) इमारत क्रमांक १०४-१०६ ,मेघजी बिल्डिंग अ, ब व क विंग, शिवदास चापसी मार्ग (मागील वर्षीच्या यादीतील)
14) इमारत क्रमांक ४० कामाठीपुरा ४ थी गल्ली
15) अंतिम भूखंड क्र. ७२१ व ७२४ टीपीएस – ३ विभाग, इमारत क्रमांक ४ बी व ४२८, आत्माराम बिल्डिंग व पेनकर चाळ (मागील वर्षीच्या यादीतील)
अतिधोकादायक इमारतींतील रहिवाशाना मंडळातर्फे आवाहन करण्यात आले आहे की, त्यांनी मंडळाच्या अधिकारी आणि कर्मचाऱ्यांना आवश्यकतेनुसार इमारती रिक्त करण्यास सहकार्य करावे व स्वतःच्या आणि आपल्या पारिजनांच्या सुरक्षेकरिता मंडळाच्या अधिकाऱ्यांनी दिलेल्या सूचनांचे पालन करावे. जेणेकरून अपघात होऊन होणारी जीवित तसेच वित्तहानी टाळता येईल. तसेच मंडळाचा नियंत्रण कक्ष अहोरात्र कार्यरत असल्याने इमारतीमध्ये कोणतीही धोक्याची लक्षणे तथा अपघात घडल्यास नियंत्रण कक्षास सूचित करण्यात यावे.
