Ladki Bahin Yojana: मुख्यमंत्री माझी लाडकी बहीण योजनेचा लाभ घेणाऱ्या सर्व महिलांसाठी एक महत्त्वाची बातमी आहे. राज्य सरकारने या योजनेअंतर्गत e-KYC प्रक्रिया अनिवार्य केली असून, आता दरवर्षी सर्व पात्र लाभार्थींना ही पडताळणी करावी लागणार आहे. या प्रक्रियेद्वारे लाभार्थ्यांची माहिती अधिक अचूक आणि पारदर्शक ठेवण्याचा सरकारचा उद्देश आहे.
या योजनेअंतर्गत पात्र महिलांना दर महिन्याला 1500 इतकी आर्थिक मदत दिली जाते. मात्र, अनेक लाभार्थींना तांत्रिक कारणांमुळे e-KYC पूर्ण करताना अडचणी येत होत्या. आता सरकारने प्रणालीत सुधारणा केल्याने प्रक्रिया अधिक सुलभ करण्यात आली आहे. महिला व बालविकास मंत्री आदिती तटकरे यांनी याबाबत माहिती देताना सांगितले की, ‘लाडकी बहिणींची e-KYC प्रक्रिया सुरळीत सुरू आहे आणि ज्या लाभार्थींनी अद्याप ती पूर्ण केलेली नाही, त्यांनी 18 नोव्हेंबर 2025 पूर्वी ती पूर्ण करावी.’
मुख्यमंत्री माझी लाडकी बहीण योजनेमध्ये पारदर्शकता येण्यासाठी व लाभार्थ्यांना नियमितपणे आर्थिक लाभ मिळण्यासाठी e-KYC सुविधा उपलब्ध करून देण्यात आली आहे. या प्रक्रियेत अधिक सुसूत्रता आणण्याबाबत आज मंत्रालयात बैठक घेतली. दिनांक १८ सप्टेंबर २०२५ पासून https://t.co/gBViSYZxcm या… — Aditi S Tatkare (@iAditiTatkare) October 28, 2025
ही प्रक्रिया 18 सप्टेंबर 2025 पासून सुरू झाली असून, https://ladakibahin.maharashtra.gov.in या अधिकृत संकेतस्थळावर e-KYC करण्याची सुविधा उपलब्ध आहे. सरकारने या योजनेत पारदर्शकता राखण्यासाठी आणि गैरप्रकार टाळण्यासाठी ही प्रणाली लागू केली आहे.
e-KYC प्रक्रिया कशी करावी?
लाभार्थींनी सर्वप्रथम अधिकृत संकेतस्थळाला भेट द्यावी.
मुख्य पानावर असलेल्या ‘e-KYC’ या बॅनरवर क्लिक करावे.
तिथे दिसणाऱ्या फॉर्ममध्ये आपला आधार क्रमांक आणि कॅप्चा कोड टाकावा.
त्यानंतर ‘Send OTP’ वर क्लिक केल्यानंतर आधार लिंक मोबाईलवर आलेला OTP टाकून पुढे जावे.
जर KYC आधीच पूर्ण असेल, तर त्याबद्दल सूचना मिळेल. अन्यथा पुढील प्रक्रिया सुरू होईल.
त्यानंतर पती किंवा वडिलांचा आधार क्रमांक भरून, संमती देऊन OTP द्वारे पडताळणी करावी.
लाभार्थींनी जात प्रवर्ग निवडावा आणि कुटुंबातील सदस्यांविषयी आवश्यक घोषणांना मान्यता द्यावी.
प्रक्रिया पूर्ण झाल्यावर ‘Success तुमची e-KYC पडताळणी यशस्वीरित्या पूर्ण झाली आहे’ असा संदेश दिसेल.
सरकारच्या मते, या प्रक्रियेमुळे पात्र महिलांना नियमितपणे आर्थिक सहाय्य मिळत राहील आणि कोणत्याही प्रकारचा गैरवापर टाळता येईल. ग्रामीण आणि शहरी भागातील सर्व लाभार्थी भगिनींनी अंतिम तारखेआधी ही प्रक्रिया पूर्ण करणे आवश्यक आहे.
आदिती तटकरे यांनी सांगितले की, ‘राज्यभरातून मोठ्या प्रमाणावर प्रतिसाद मिळत आहे आणि बहुतांश लाभार्थींनी आधीच e-KYC पूर्ण केली आहे. उर्वरित महिलांनीही विलंब न लावता प्रक्रिया पूर्ण करावी.’
