बिहार: बिहारमधील जमुई जिल्ह्यात भीषण रेल्वे अपघात घडला असून, सिमेंटने भरलेल्या मालगाडीचे सुमारे 10 डबे पुलावरून थेट खाली कोसळले, तर एकूण 19 डबे रुळावरून घसरल्याची माहिती सूत्रांकडून मिळत आहे. हा अपघात झाझा-जसीडीह रेल्वे मार्गावर, सिमुलतला जवळील टेलवा हॉल्ट परिसरात बरुआ नदीवरील पुलाजवळ उशिरा रात्री घडला. या घटनेमुळे रेल्वे वाहतूक पूर्णपणे विस्कळीत झाली आहे.
मिळालेल्या माहितीनुसार, ही मालगाडी जसीडीहहून झाझाकडे जात होती. रात्री सुमारे साडे अकरा वाजण्याच्या सुमारास, आसनसोल रेल्वे मंडळाअंतर्गत येणाऱ्या पूल क्रमांक 676 आणि पोल क्रमांक 344/18 जवळ अचानक मोठा आवाज झाला आणि गाडीचे अनेक डबे रुळावरून घसरले. यातील काही डबे थेट पुलावरून खाली नदीच्या दिशेने पडले.
हेही वाचा: Mumbai Local Train Megablock: वर्षाचा शेवटचा रविवार प्रवासात जाणार? कांदिवली-बोरिवली दरम्यान रेल्वेचा मेगाब्लॉक, असा होईल परिणाम
अपघातग्रस्त मालगाडीत मोठ्या प्रमाणात सिमेंट भरलेले होते. डबे कोसळताच सिमेंटचे पोते आणि ढिगारा पुलावर आणि आजूबाजूच्या परिसरात विखुरले, त्यामुळे रेल्वे रुळांचे मोठे नुकसान झाले आहे. या अपघाताचा परिणाम म्हणून अप आणि डाउन दोन्ही मार्गांवरील रेल्वे वाहतूक ठप्प झाली असून, किउल-जसीडीह रेल्वे मार्गावरील अनेक प्रवासी आणि मालगाड्या विविध स्थानकांवर थांबवण्यात आल्या आहेत.
घटनेची माहिती मिळताच रेल्वे प्रशासन, रेल्वे पोलीस, RPF आणि तांत्रिक पथक तातडीने घटनास्थळी दाखल झाले. परिस्थितीचा आढावा घेऊन डबे हटवण्यासाठी आणि ट्रॅक दुरुस्तीसाठी विशेष गाड्या व अवजड यंत्रसामग्री झाझा आणि जसीडीह येथून रवाना करण्यात आली आहे.
या भीषण अपघातात कोणतीही जीवितहानी झाल्याची माहिती नाही, ही दिलासादायक बाब आहे. मात्र, रेल्वे मालमत्तेचे मोठे नुकसान झाले असून, वाहतूक पूर्ववत करण्यासाठी मोठ्या प्रमाणावर काम सुरू आहे. सध्या अपघाताचे नेमके कारण शोधण्याचे काम सुरू असून, प्राथमिक अंदाजानुसार तांत्रिक बिघाड किंवा ट्रॅकमधील दोष कारणीभूत असण्याची शक्यता वर्तवण्यात येत आहे.
रेल्वे प्रशासनाने स्पष्ट केले आहे की दुरुस्तीचे काम पूर्ण झाल्यानंतरच रेल्वे वाहतूक सुरू केली जाईल. तोपर्यंत प्रवाशांनी पर्यायी मार्गांचा वापर करावा, असे आवाहनही करण्यात आले आहे.
