भारत आणि चीनमधील थेट विमानसेवा पाच वर्षांनंतर पुन्हा सुरू झाली आहे. कोलकात्यातील नेताजी सुभाषचंद्र बोस आंतरराष्ट्रीय विमानतळावरून इंडिगो फ्लाइट 6E1703 चीनकडे रवाना झाली असून, या उड्डाणाने दोन्ही देशांमधील एअर कनेक्टिव्हिटीचे पुनरागमन झाले आहे. ही फ्लाइट रात्री 10:07 वाजता कोलकात्यातून उड्डाण करत सकाळी 4:05 वाजता चीनच्या ग्वांगझोऊ विमानतळावर पोहोचली. एकूण 176 प्रवासी या पहिल्या उड्डाणातून प्रवासाला निघाले.
कोविड-19 महामारीदरम्यान सर्व थेट विमानसेवा बंद झाल्यानंतर आता एवढ्या मोठ्या अंतराने उड्डाणांना परवानगी मिळाल्याने विमानतळावर उत्साहाचे वातावरण होते. विमानतळ संचालक डॉ. पी.आर. बियूरिया, एअरपोर्ट अथॉरिटी ऑफ इंडिया आणि इंडिगोच्या वरिष्ठ अधिकाऱ्यांच्या उपस्थितीत पारंपरिक पद्धतीने दीपप्रज्वलन करून उड्डाणाचे औपचारिक उद्घाटन करण्यात आले.
इंडिगोने कोलकाता-ग्वांगझोऊ या मार्गावरील नॉन-स्टॉप दररोजची विमानसेवा सुरू केली आहे. याशिवाय, 9 नोव्हेंबरपासून दिल्ली-शांघाय आणि 10 नोव्हेंबरपासून दिल्ली-ग्वांगझोऊ या मार्गांवरील उड्डाणेही पुन्हा सुरू होणार आहेत. त्यामुळे दोन्ही देशांतील थेट प्रवासाचे पर्याय आणखी वाढतील.
या निर्णयाचा फायदा व्यापार क्षेत्र, शैक्षणिक संस्था आणि सामान्य प्रवाशांना मोठ्या प्रमाणात होणार आहे. विशेषतः चीनमध्ये शिक्षण घेणाऱ्या भारतीय विद्यार्थ्यांची गैरसोय कमी होईल. तसेच व्यावसायिक चर्चा, वैद्यकीय उपचार आणि पर्यटनातही यामुळे गती येण्याची अपेक्षा आहे.
तज्ज्ञांच्या मते, भारत-चीन संबंध सामान्य करण्याच्या प्रयत्नांना या पावलामुळे बळकटी मिळेल. सीमावादानंतर निर्माण झालेला तणाव कमी करण्यासाठी राजनैतिक स्तरावर सातत्याने संवाद सुरू आहे आणि थेट उड्डाणांची पुन्हा सुरुवात त्यातील एक महत्त्वाची कडी मानली जात आहे.
एकूणच, दोन्ही देशांमधील थेट विमान प्रवासाचा हा नवा टप्पा आर्थिक आणि कूटनीतिक सहकार्य वाढवणारा ठरेल, अशी अपेक्षा व्यक्त केली जात आहे. प्रवाशांपासून ते व्यापाऱ्यांपर्यंत अनेक वर्गांसाठी ही सुविधा मोठी दिलासा देणारी ठरणार आहे.
हेही वाचा: Jalgaon Shocker: धक्कादायक! जळगावमध्ये रुळावर रील बनवताना रेल्वेच्या धडकेत दोघांचा मृत्यू
