Weather Update: देशातील अनेक राज्यांमध्ये हवामानाने अचानक आक्रमक रूप धारण केले असून भारतीय हवामान विभागाने पुढील काही तास अत्यंत महत्त्वाचे असल्याचा इशारा दिला आहे. काही भागांत मुसळधार पाऊस, वादळी वारे आणि मेघगर्जनेचा अंदाज वर्तवण्यात आला आहे, तर काही राज्यांमध्ये उष्णतेची लाट अधिक तीव्र होण्याची शक्यता आहे. हवामान खात्याने तब्बल 13 राज्यांसाठी सतर्कतेचा इशारा जारी केला असून नागरिकांना आवश्यक ती खबरदारी घेण्याचे आवाहन करण्यात आले आहे.
बिहार, झारखंड, ओडिशा, उत्तराखंड, हिमाचल प्रदेश यांसारख्या राज्यांमध्ये पुढील 15 तासांत जोरदार पावसाची शक्यता व्यक्त करण्यात आली आहे. काही भागांमध्ये वाऱ्याचा वेग ताशी 65 ते 70 किलोमीटरपर्यंत जाऊ शकतो. त्यामुळे स्थानिक प्रशासनही सतर्क झाले आहे.
दुसरीकडे राजधानी दिल्लीसह उत्तर भारतातील अनेक राज्यांमध्ये उष्णतेचा तडाखा कायम आहे. दिल्ली-एनसीआरमध्ये पुढील काही दिवस तापमान आणखी वाढण्याचा अंदाज असून नागरिकांना उष्णतेच्या लाटेचा सामना करावा लागू शकतो. उत्तर प्रदेशातही परिस्थिती गंभीर आहे. बांदा येथे तापमान 47 अंशांच्या पुढे गेले असून आग्रा, प्रयागराज, नोएडा, कानपूर आणि वाराणसीसारख्या शहरांसाठी उष्णतेचा इशारा देण्यात आला आहे.
महाराष्ट्रातही उष्णतेपासून तात्काळ दिलासा मिळण्याची चिन्हे दिसत नाहीत. विशेषतः विदर्भातील नागरिकांना प्रचंड उकाड्याचा सामना करावा लागत आहे. अकोला, अमरावती आणि वर्धा जिल्ह्यांसाठी हवामान विभागाने ‘ऑरेंज अलर्ट’ जारी केला आहे. नागपूर, यवतमाळ आणि आसपासच्या भागांतही तापमान उच्चांक गाठत आहे. पुढील काही दिवस कोरडे आणि उष्ण हवामान कायम राहण्याची शक्यता आहे.
उत्तराखंडमध्ये मात्र हवामानात बदल होण्याचे संकेत मिळत आहेत. उत्तरकाशी, चमोलीसह डोंगराळ भागांमध्ये विजांच्या कडकडाटासह हलक्या ते मध्यम स्वरूपाच्या पावसाचा अंदाज वर्तवण्यात आला आहे. हिमाचल प्रदेशातही पुढील 48 तासांत मुसळधार पावसाची शक्यता व्यक्त करण्यात आली आहे.
ओडिशा आणि बिहारमध्ये वादळी वाऱ्यांसह पावसाचा जोर वाढू शकतो. काही भागांत वाऱ्याचा वेग ताशी 80 किलोमीटरपर्यंत पोहोचण्याचा अंदाज हवामान विभागाने दिला आहे. त्यामुळे नागरिकांना घराबाहेर पडताना विशेष काळजी घेण्याचा सल्ला देण्यात आला आहे.
राजस्थानमध्ये उष्णतेसह धुळीच्या वादळांचा इशारा देण्यात आला आहे. येत्या काही दिवसांत तापमानात आणखी वाढ होण्याची शक्यता असून अनेक भागांत हवामान कोरडे राहणार आहे. तेलंगणातही पुढील चार ते पाच दिवस ‘हाय अलर्ट’ जारी करण्यात आला आहे.
हवामान विभागाच्या अंदाजानुसार देशभरात सध्या दोन वेगवेगळ्या परिस्थिती निर्माण झाल्या आहेत. एका बाजूला उष्णतेने नागरिक हैराण झाले आहेत, तर दुसऱ्या बाजूला काही राज्यांमध्ये पाऊस आणि वादळी वाऱ्यांचा धोका वाढला आहे. त्यामुळे पुढील काही दिवस हवामानातील बदलांकडे सर्वांचे लक्ष लागले आहे.
