विधान परिषदेच्या आमदार मनिषा कायंदे यांनी रविवारी (दि.१८ जून) शिंदे गटाच्या शिवसेनेत प्रवेश केला. मुख्यमंत्री एकनाथ शिंदे यांच्या उपस्थितीत हा पक्षप्रवेश पार पडला. मनिषा कायंदे यांची शिवसेना सचिव आणि पक्षप्रवक्तेपदी नियुक्ती करण्यात आली. तर, ‘चाळीस कोटींच्या फाईलमुळे मनिषा कायंदेंचा शिवसेनेत प्रवेश’ झाला असल्याचा संजय राऊत यांनी आरोप केला आहे.
याच पार्शवभूमीवर ‘मी कुठल्याही आमिषाला बळी पडलेली नाही’ असं स्पष्टीकरण मनिषा कायंदे यांनी दिलं आहे. मनिषा कायंदे यांनी शिवसेनेत प्रवेश करताच आपल्या मनातली खंत बोलून दाखवली आहे. “अनेक वर्षांपासून शिवसेना पक्षात आहेत. परंतु मला या सत्तांतराच्या काळानंतर कधीही संधी देण्यात आली नाही. अनेक ठिकाणी माझे प्रश्न आहेत ते डावलले जायचे. अनेक काम मला करायचं होतं. त्यासाठी मी संधी मागत होते. परंतू ती संधी मला उद्धव ठाकरे यांनी दिली नाही. शिवसेना पक्षात अनेक पक्षप्रवेश होत आहेत. ते पाहून तसंच राज्याचा देखील विकास होत आहे, तो मी पाहत आहे. मुख्यमंत्री एकनाथ शिंदे यांच्या मार्गदर्शनाखाली राज्याचा विकास होत असताना मला देखील विकासामध्ये यायचं होतं. म्हणून त्यासाठी मी आज निर्णय घेतला आणि या ठिकाणी पक्ष प्रवेश केलेला आहे”, असं मनिषा कायंदे म्हणाल्या आहेत.
