हिंगोली : हिंगोली शहरातील अष्टविनायक नगर परिसरात घडलेल्या एका दुर्दैवी घटनेने संपूर्ण परिसरात शोककळा पसरली आहे. NEET परीक्षेच्या तणावातून 18 वर्षीय तरुणाने आपले जीवन संपवल्याची धक्कादायक घटना समोर आली आहे. सुशील ढगे असे या तरुणाचे नाव असून तो हिंगोली शहरातील रहिवासी होता.
सुशीलने वैद्यकीय प्रवेशासाठी आवश्यक असलेल्या NEET परीक्षेची तयारी मोठ्या अपेक्षांसह केली होती. कुटुंबीयांनीही त्याला या परीक्षेसाठी प्रोत्साहन दिले होते. मात्र परीक्षा कठीण गेल्याने तो गेल्या काही दिवसांपासून मानसिक तणावात असल्याचे कुटुंबीयांचे म्हणणे आहे. परीक्षेनंतर तो अधिकच अस्वस्थ आणि चिंताग्रस्त झाला होता.
घटनेच्या काही वेळापूर्वी सुशीलने एक व्हिडिओ संदेश रेकॉर्ड करून तो आपल्या कुटुंबीयांना पाठवला. या व्हिडिओमध्ये त्याने भावनिक शब्दांत आईची माफी मागितली असून, “मम्मी मला माफ कर, माझा ताण घेऊ नकोस, मी पुढच्या जन्मी तुझ्याच पोटी जन्म घेईन” असे तो म्हणताना दिसतो. त्याने भावाला चांगले राहण्याचा सल्ला दिला आणि आपल्या मानसिक तणावाचा उल्लेखही केला.
व्हिडिओ पाठवल्यानंतर काही वेळातच त्याने आपले जीवन संपवल्याची माहिती समोर आली आहे. या घटनेमुळे कुटुंबीयांवर आणि परिसरातील नागरिकांवर मोठा आघात झाला आहे. पोलिसांनी घटनास्थळी भेट देऊन पंचनामा केला असून अधिक तपास सुरू आहे.
या घटनेनंतर NEET परीक्षेचा वाढता तणाव, विद्यार्थ्यांवरील मानसिक दडपण आणि स्पर्धात्मक परीक्षांच्या परिणामांवर पुन्हा एकदा चर्चा सुरू झाली आहे. शिक्षण व्यवस्थेत विद्यार्थ्यांच्या मानसिक आरोग्याला अधिक महत्त्व देण्याची गरज असल्याचे मत तज्ज्ञांकडून व्यक्त केले जात आहे.
अशा घटनांपासून विद्यार्थ्यांना दूर ठेवण्यासाठी पालक, शिक्षक आणि समाजाने संवेदनशील भूमिका घेण्याची आवश्यकता असल्याचेही सांगितले जात आहे.
