मुंबई: जागतिक पटलावर युद्धाचे ढग दाटून आले असताना, त्याचे थेट पडसाद जागतिक अर्थकारणावर आणि पर्यायाने सर्वसामान्यांच्या खिशावर उमटत आहेत. इराण आणि इस्रायलमधील वाढत्या तणावामुळे जागतिक बाजारात मोठी अस्थिरता निर्माण झाली आहे. या अस्थिरतेच्या काळात सुरक्षित गुंतवणूक म्हणून सोन्याकडे पाहिले जाते, त्यामुळे गेल्या काही दिवसांत सोन्याने उच्चांकी झेप घेतली होती. मात्र, आता सलग तीन दिवसांपासून सोन्याच्या दरात घसरण पाहायला मिळत असून, गगनाला भिडलेले भाव खाली येत असल्याने सर्वसामान्यांना मोठा दिलासा मिळाला आहे.
आज, 24 एप्रिल 2026 रोजी सराफा बाजारात पुन्हा एकदा मोठी पडझड पाहायला मिळाली. सोन्याच्या दरात आज प्रति 10 ग्रॅममागे 500 रुपयांची, तर चांदीच्या दरात तब्बल 3 हजार रुपयांची मोठी घसरण नोंदवली गेली आहे. या ताज्या घसरणीनंतर, जीएसटीसह (GST) सोन्याचा नवा दर 1 लाख 55 हजार रुपये प्रति 10 ग्रॅम इतक्या नीचांकी पातळीवर आला आहे. दुसरीकडे, चांदीनेही एकाच दिवसात 3 हजारांची आपटी खाल्ल्याने, जीएसटीसह चांदीचा दर 2 लाख 52 हजार 350 रुपये प्रति किलोवर स्थिरावला आहे.
गेल्या आठवडाभराच्या आकडेवारीवर नजर टाकल्यास ही घसरण अधिक स्पष्ट होते. एका आठवड्यात सोन्याच्या दरात एकूण 2300 रुपयांची कपात झाली आहे, तर चांदीने चक्क 15 हजार रुपयांची ऐतिहासिक घसरण नोंदवली आहे. आंतरराष्ट्रीय बाजारातील अनिश्चिततेमुळे सोने-चांदीच्या दरात होत असलेले हे 'रोलरकोस्टर' बदल गुंतवणूकदार आणि ग्राहकांच्या काळजाचा ठोका चुकवणारे ठरत होते. मात्र, सलग तीन दिवसांच्या या घसरणीने बाजारातील चित्र काहीसे बदलले आहे.
दरात झालेली ही लक्षणीय घसरण पाहून सर्वसामान्य ग्राहकांच्या चेहऱ्यावर समाधानाचे हास्य फुलले आहे. लग्नसराईचा काळ आणि आगामी सण-उत्सवांच्या पार्श्वभूमीवर दागिने घडवण्यासाठी ग्राहकांची पावले आता पुन्हा सराफा बाजाराकडे वळू लागली आहेत. वाढत्या दरामुळे ज्यांनी खरेदी पुढे ढकलली होती, त्यांच्यासाठी ही घसरण म्हणजे अक्षरशः एका 'सुवर्णसंधी'सारखीच ठरली आहे. त्यामुळे सराफा पेढ्यांवर पुन्हा एकदा ग्राहकांची लगबग आणि गर्दी पाहायला मिळत आहे.
मात्र, या आनंदाच्या वातावरणातही अनेक जाणकार आणि गुंतवणूकदारांच्या मनात एक मोठा प्रश्न उभा आहे; तो म्हणजे भविष्यातही ही घसरण अशीच चालू राहील का? आणि सध्याच्या घसरलेल्या दरात सोन्यात गुंतवणूक करणे योग्य ठरेल का? तज्ज्ञांच्या मते, सोन्याचे दर हे पूर्णपणे आंतरराष्ट्रीय घडामोडी आणि भूराजकीय तणावावर (Geopolitical Tensions) अवलंबून असतात. इराणच्या युद्धस्थितीत जर काही सकारात्मक बदल झाले, तर दरात आणखी घसरण होऊ शकते. मात्र, अस्थिरता वाढल्यास सोन्याला पुन्हा झळाळी मिळण्याची शक्यताही नाकारता येत नाही. त्यामुळे दीर्घकालीन गुंतवणुकीचा विचार करणाऱ्यांनी बाजाराच्या कलवर बारकाईने लक्ष ठेवूनच निर्णय घेणे योग्य ठरेल.
