बीड: मराठा आरक्षण आंदोलनात सहभागी होण्यासाठी मोटारसायकल रॅलीने निघालेल्या तरुणांवर काळाने घाला घातला. बीड जिल्ह्यातील गेवराई परिसरात झालेल्या भीषण अपघातात 36 वर्षीय कृष्णा नानासाहेब डाके यांचा जागीच मृत्यू झाला, तर आणखी एक तरुण जखमी झाला आहे. या घटनेमुळे गेवराई परिसरात शोककळा पसरली असून मराठा आंदोलकांमध्येही हळहळ व्यक्त केली जात आहे.
मिळालेल्या माहितीनुसार, मनोज जरांगे पाटील यांच्या आंदोलनाच्या पार्श्वभूमीवर राज्य सरकारचे शिष्टमंडळ उपोषणस्थळी भेट देणार असल्याची चर्चा होती. त्यामुळे गेवराई आणि परिसरातील अनेक तरुण मोटारसायकल रॅलीच्या माध्यमातून सराटी-अंतरवालीकडे रवाना झाले होते. याच प्रवासादरम्यान त्यांच्या दुचाकीचा अपघात झाला.
या दुर्घटनेत कृष्णा नानासाहेब डाके (वय 36) यांना गंभीर दुखापत झाली. स्थानिकांनी तत्काळ मदतीसाठी धाव घेतली. मात्र, त्यांचा घटनास्थळीच मृत्यू झाल्याचे स्पष्ट झाले. अपघातात जखमी झालेल्या दुसऱ्या तरुणाला तातडीने उपचारासाठी रुग्णालयात दाखल करण्यात आले असून त्याच्यावर वैद्यकीय उपचार सुरू आहेत.
अपघाताची माहिती मिळताच गेवराई उपजिल्हा रुग्णालयात मराठा समाजातील शेकडो कार्यकर्ते आणि आंदोलकांनी गर्दी केली. मृत तरुणाच्या कुटुंबीयांवर दुःखाचा डोंगर कोसळला असून परिसरात शोकमय वातावरण निर्माण झाले आहे. आंदोलनासाठी उत्साहाने घराबाहेर पडलेल्या तरुणाचा अशा प्रकारे मृत्यू झाल्याने अनेकांनी हळहळ व्यक्त केली.
दरम्यान, हा अपघात नेमका कोणत्या कारणामुळे झाला, याचा तपास गेवराई पोलीस करत आहेत. दुचाकीचा वेग, रस्त्याची परिस्थिती किंवा इतर कोणते कारण या दुर्घटनेला कारणीभूत ठरले का, याची चौकशी सुरू आहे. घटनास्थळाची पाहणी करून पोलिसांनी पुढील तपासाला वेग दिला आहे.
मराठा आरक्षण आंदोलनाच्या पार्श्वभूमीवर राज्यभरातून अनेक कार्यकर्ते आणि समर्थक सराटी-अंतरवालीकडे जात असताना ही दुर्दैवी घटना घडल्याने आंदोलनाच्या वातावरणावरही शोककळा पसरली आहे. जखमी तरुणाच्या प्रकृतीकडे सर्वांचे लक्ष लागले असून, या अपघाताचा संपूर्ण घटनाक्रम पोलिसांच्या तपासातून स्पष्ट होण्याची अपेक्षा व्यक्त केली जात आहे.
