नाशिक : नाशिक जिल्ह्यातील पेठ मार्गावरील सावळघाटात रविवारी सायंकाळी झालेल्या भीषण अपघाताने संपूर्ण परिसर हादरला. दोन मालवाहू ट्रकांच्या मध्ये अडकून एका मारुती इको कारचा अक्षरशः चुराडा झाला. या भीषण दुर्घटनेत कारमधील चार जणांचा जागीच मृत्यू झाला, तर एक जण गंभीर जखमी झाला आहे. मृत आणि जखमी सर्वजण गुजरातमधील असून सप्तशृंगी देवीचे दर्शन घेऊन मायदेशी परतत असताना हा दुर्दैवी अपघात घडला.
मिळालेल्या माहितीनुसार, गुजरातमधील काही भाविकांनी सप्तशृंगी देवीचे दर्शन घेण्यासाठी नाशिक जिल्ह्यात भेट दिली होती. दर्शन आटोपल्यानंतर ते मारुती इको कारने परतीच्या प्रवासाला निघाले होते. नाशिक-पेठ मार्गावरील सावळघाटातून कार जात असताना अचानक मागून येणाऱ्या मालवाहू ट्रकचे ब्रेक निकामी झाल्याची प्राथमिक माहिती समोर आली आहे.
ब्रेक फेल झाल्याने चालकाचा ट्रकवरील ताबा सुटला आणि भरधाव ट्रकने समोरील इको कारला जोरदार धडक दिली. या धडकेमुळे कार पुढे असलेल्या दुसऱ्या मालट्रकवर आदळली. काही क्षणांतच कार दोन्ही अवजड वाहनांच्या कचाट्यात सापडली आणि तिचा अक्षरशः चक्काचूर झाला.
अपघात इतका भीषण होता की, कारमधील प्रवासी बाहेर पडण्याची संधीही मिळाली नाही. या दुर्घटनेत राजोयाभाई तुमडा (५५), अनुभाई वळवी (३०), रमणभाई चिमण्या (४९) आणि धर्माबाई जेमेनिया (४०) यांचा मृत्यू झाला. तर खालपाभाई गोकुळ हे गंभीर जखमी झाले असून त्यांच्यावर नाशिक येथील जिल्हा रुग्णालयात उपचार सुरू आहेत.
घटनेची माहिती मिळताच पेठ आणि दिंडोरी पोलीस, स्थानिक प्रशासन तसेच मदत पथके तातडीने घटनास्थळी दाखल झाली. कारचा पुढील आणि मागील भाग पूर्णपणे दाबला गेल्यामुळे मृतदेह बाहेर काढण्यासाठी बचाव पथकाला कारचे पत्रे कापावे लागले. त्यानंतर मृतदेह शवविच्छेदनासाठी ग्रामीण रुग्णालयात पाठविण्यात आले.
अपघातानंतर सावळघाटात दोन्ही बाजूंनी वाहनांच्या लांबच लांब रांगा लागल्या होत्या. पोलिसांनी क्रेनच्या मदतीने अपघातग्रस्त वाहने हटवून वाहतूक सुरळीत केली. काही काळ वाहतुकीवर मोठा परिणाम झाला होता.
सावळघाट हा नाशिक जिल्ह्यातील धोकादायक घाटरस्त्यांपैकी एक मानला जातो. तीव्र उतार, वळणदार रस्ता आणि अवजड वाहनांची सततची वर्दळ यामुळे येथे वारंवार अपघात घडत असतात. त्यामुळे या मार्गावर वाहन चालविताना विशेष काळजी घेण्याचे आवाहन प्रशासनाकडून सातत्याने केले जाते.
दरम्यान, या अपघाताचे नेमके कारण आणि ट्रकचे ब्रेक निकामी होण्यामागील तांत्रिक बाबींचा तपास पोलीस करत आहेत. या दुर्घटनेमुळे भाविकांच्या कुटुंबियांवर दुःखाचा डोंगर कोसळला असून परिसरात हळहळ व्यक्त केली जात आहे.
