Fire at Taj Mahal Premises: जगप्रसिद्ध ताजमहाल परिसरात रविवारी सकाळी अचानक लागलेल्या आगीमुळे खळबळ उडाली. दक्षिणेकडील प्रवेशद्वाराजवळ, मुख्य घुमटापासून सुमारे 300 मीटर अंतरावर ही आग लागली. सकाळी आठच्या सुमारास अचानक आग लागल्याने परिसरात गोंधळ निर्माण झाला. काही क्षणातच दाट काळा धूर पसरल्याने पर्यटक आणि कर्मचाऱ्यांमध्ये भीतीचे वातावरण निर्माण झाले.
हेही वाचा – Diwali : केंद्र सरकारचे कर्मचाऱ्यांना दिवाळीचं खास गिफ्ट, DA आणि बोनसबाबत मोठी घोषणा
प्राथमिक माहितीनुसार, आगीचे कारण शॉर्ट सर्किट असल्याचा अंदाज वर्तवला जात आहे. घटनास्थळी तैनात कर्मचाऱ्यांनी तत्काळ भारतीय पुरातत्व सर्वेक्षण (ASI) अधिकाऱ्यांना आणि टोरेंट पॉवर कंपनीला कळवले. वीजपुरवठा थांबवून दुरुस्तीचे काम तातडीने सुरू करण्यात आले. सुमारे दोन तासांच्या प्रयत्नांनंतर वीजपुरवठा पुनर्संचयित करण्यात आला. ताजमहालच्या दक्षिण दरवाज्याच्या उजव्या बाजूला असलेल्या चेंबरच्या वरून जाणाऱ्या एलटी वीजवाहिनीतून ठिणगी निघाल्याने प्लास्टिक जॉइंट पेटल्याचे समोर आले आहे. सुदैवाने, ही आग केवळ बाह्य वीजवाहिनीपुरती मर्यादित राहिली आणि स्मारकाच्या मुख्य रचनेला कोणतेही नुकसान झाले नाही.
ताजमहालचे वरिष्ठ संवर्धन सहाय्यक प्रिन्स वाजपेयी यांनी सांगितले की, शॉर्ट सर्किटमुळे स्मारकाच्या कोणत्याही यंत्रणेवर परिणाम झाला नाही. यूपीएस प्रणाली तातडीने कार्यान्वित करण्यात आल्या आणि टोरेंट पॉवरच्या पथकाने दोन तासांत संपूर्ण दुरुस्ती पूर्ण केली. दरम्यान, सुरक्षेच्या कारणास्तव ताजमहालचा दक्षिण दरवाजा 2018 पासून पर्यटकांसाठी बंद आहे. त्यामुळे या घटनेचा कोणत्याही पर्यटकांवर परिणाम झाला नाही. जगप्रसिद्ध ताजमहाल हा भारताचा अभिमान आणि जगभरातील पर्यटकांचे आकर्षण केंद्र आहे. त्यामुळे अशा छोट्या घटनांनाही विशेष महत्त्व दिले जाते. सुदैवाने, या घटनेत स्मारक पूर्णपणे सुरक्षित असून प्रशासनाने तत्काळ उपाययोजना करून संभाव्य धोका टाळला.
