FDA Seizes Unsafe Food: सणासुदीच्या काळात अन्न सुरक्षेला प्राधान्य देण्यासाठी राज्यभरात राबविण्यात आलेल्या विशेष मोहिमेत अन्न आणि औषध प्रशासनाने (FDA) 8,03,942 किलोहून अधिक असुरक्षित किंवा निकृष्ट दर्जाचे अन्न साठा जप्त केला आहे. ही कारवाई 11 ऑगस्ट ते 12 ऑक्टोबर दरम्यान करण्यात आली. या काळात FDA ने 4,676 अन्नाचे नमुने गोळा करून तपासणी केली. ज्यात दूध, खाद्यतेल, तूप, खवा-मावा, मिठाई, सुकामेवा, चॉकलेट, भगर व इतर पदार्थांचा समावेश होता. या नमुन्यांमध्ये 918 प्रमाणित, 51 निकृष्ट, 16 असुरक्षित आणि 8 चुकीचे ब्रँड केलेले आढळले.
ही मोहीम 'सण महाराष्ट्रचा, संकल्प अन्नसुरक्षेचा' या विशेष उपक्रमाचा भाग असून, दिवाळीच्या हंगामात ग्राहकांना भेसळयुक्त आणि असुरक्षित अन्नापासून वाचविण्यासाठी 25 ऑक्टोबरपर्यंत सुरू राहणार आहे. मुंबई, पुणे, नागपूर आणि छत्रपती संभाजीनगरसह प्रमुख शहरांमध्ये FDA पथकांनी मिठाईच्या दुकाने, दुग्धशाळा, गोदामे आणि अन्न प्रक्रिया युनिट्समध्ये अचानक तपासण्या केल्या.
दरम्यान, या उपक्रमाचा भाग म्हणून भेसळयुक्त अन्नाचे हानिकारक परिणाम दाखवणारे पथनाटे आणि अन्न सुरक्षेबाबत माहितीपट आयोजित केले गेले. तसेच, मिठाई उत्पादक, महिला बचत गट व अन्न व्यवसाय संचालकांसाठी स्वच्छता व सुरक्षा मानकांवरील कार्यशाळा घेण्यात आल्या. FDA सचिव धीरज कुमार यांनी सर्व अन्न व्यवसायांना कायदेशीर मानकांचे काटेकोर पालन करण्याचे आवाहन केले.
हेही वाचा – Diwali 2025: सावधान! मिठाईत होतेय भेसळ, दोन महिन्यात सुमारे दोन कोटी रुपयांचे भेसळयुक्त पदार्थ जप्त
याशिवाय, आयुक्त राजेश नार्वेकर यांनी सणांच्या काळात अन्न उत्पादनांच्या मागणीमुळे भेसळ होण्याचा धोका अधिक असल्याचे सांगितले. नागरिकांना टोल-फ्री हेल्पलाइन 1800-222-365 वर कॉल करून अन्न सुरक्षा तक्रारी नोंदवण्याचे आवाहन करण्यात आले आहे. या मोहिमेमुळे सणासुदीच्या काळात नागरिकांना सुरक्षित आणि दर्जेदार अन्न उपलब्ध होईल. तसेच भेसळ व आरोग्य धोके टळतील.
