जय महाराष्ट्र न्युज, मुंबई
भविष्य निर्वाह निधीतून (पीएफ) दहा लाखांहून अधिक रक्कम काढण्यासाठीचा अर्ज ऑनलाइन पद्धतीनेच करण्याची सक्ती कर्मचारी भविष्य निर्वाह निधी कार्यालयाने (ईपीएफओ) मागे घेतली आहे. पीएफ काढण्यासाठी ऑनलाइन अर्ज करताना असंख्य अडचणी येत असल्याची तक्रार पीएफ खातेधारकांकडून केली जात होती. त्या पार्श्वभूमीवर ईपीएफओने आपल्या निर्णयापासून यू टर्न घेत खातेधारकांना ऑनलाइन पद्धतीप्रमाणेच ऑफलाइन अर्ज करण्याची मुभा दिली आहे. त्यामुळे अनेक पीएफ खातेधारकांना दिलासा मिळाला आहे.
देशभरातील पीएफ कार्यालये ऑगस्टपासून पेपरलेस करण्याचे उद्दिष्ट ईपीएफओने निश्चित केले आहे. त्याअंतर्गत पीएफ खात्यातून दहा लाखांहून अधिक रक्कम आणि कर्मचारी निवृत्ती वेतन योजनेतून (ईपीएस) पाच लाख रुपयांहून अधिक रक्कम काढण्यासाठी अर्ज ऑनलाइन पद्धतीनेच स्वीकारण्याचा निर्णय ईपीएफओने घेतला होता. पीएफ काढण्यासाठी सदस्यांनी ऑनलाइन अर्ज केल्यास तीन दिवसांत संबंधितांच्या ‘आधार’शी संलग्न बँक खात्यावर रक्कम जमा केली जात होती. मात्र, अनेक खातेधारकांना ऑनलाइन अर्ज करताना अडचणी येत होत्या. तसेच अनेक खातेधारकांनी आपले बँक खाते व युनिव्हर्सल अकाउंट नंबर (यूएएन) ‘आधार’शी जोडले नव्हते. त्यामुळे पैसे काढताना खातेधारकांना अडचणी येत होत्या. त्या पार्श्वभूमीवर हा नियम शिथिल करण्यात आल्याचे परिपत्रक ईपीएफओने सर्व कार्यालयांना पाठविले आहे. त्यानुसार, आता खातेधारकांना दहा लाखाहून अधिक पीएफ रक्कम काढण्यासाठी ऑनलाइनसोबत ऑफलाइन अर्जही करता येणार आहेत, असे पीएफ कार्यालयाच्या पुणे विभागाचे आयुक्त अरुण कुमार यांनी सांगितले. मात्र, ऑनलाइन अर्ज करण्याची प्रक्रिया सुलभ असून त्याचा वापर केल्यास सदस्यांना घरबसल्या पीएफचे पैसे काढता येतील, असेही त्यांनी आवर्जून नमूद केले.
