Eknath Shinde On Kunal Kamra: महाराष्ट्राचे राजकारण सध्या चांगलेचं तापले आहे. उपमुख्यमंत्री आणि शिवसेना प्रमुख एकनाथ शिंदे यांच्यावर विनोदी कलाकार कुणाल कामरा यांनी केलेल्या टिप्पणीनंतर वाद वाढतच चालला आहे. एकीकडे उद्धव ठाकरे गट कुणाल कामराच्या समर्थनात आहे, तर दुसरीकडे मुंबई पोलिसांनी कुणाल कामराला हजर राहण्यासाठी समन्स बजावले आहे. या सगळ्यामध्ये, या संपूर्ण वादावर एकनाथ शिंदे यांची प्रतिक्रिया समोर आली आहे.
कुणाल कामराच्या टिपण्णीवर एकनाथ शिंदे काय म्हणाले?
विनोदी कलाकार कुणाल कामरा यांच्या वक्तव्यांवर प्रतिक्रिया देताना एकनाथ शिंदे यांनी म्हटलं की, 'अभिव्यक्ती स्वातंत्र्य आहे. आम्हाला व्यंग समजते, पण त्याला एक मर्यादा असायला हवी. हे एखाद्याविरुद्ध बोलण्यासाठी 'सुपारी' घेण्यासारखे आहे. समोरच्या व्यक्तीनेही एक विशिष्ट पातळी राखली पाहिजे, अन्यथा कृतीवर प्रतिक्रिया येते.'
हेही वाचा – Kunal Kamra Controversy: मुंबई पोलिसांकडून कुणाल कामराला समन्स; चौकशीसाठी हजर राहावे लागणार
तथापि, कुणाल कामराच्या वादग्रस्त गाण्यावर आणि शिंदे शिवसैनिकांनी केलेल्या तोडफोडीवर प्रतिक्रिया देताना एकनाथ शिंदे म्हणाले की, 'कामराने जे म्हटले ते अभिव्यक्ती स्वातंत्र्य नाही, ते लाच घेतल्यानंतर बोलत आहेत. आमच्या कार्यकर्त्यांनी जे केले ते एखाद्या कृतीची प्रतिक्रिया आहे. हे अभिव्यक्ती स्वातंत्र्य नाही. हे आरोप एखाद्याकडून लाच घेतल्यानंतर करण्यात आले आहेत. म्हणूनच मी यावर प्रतिक्रिया दिली नाही. मी बोलणारही नाही. मी एक काम करणारा माणूस आहे.'
याशिवाय, तुमच्या पक्षाच्या कार्यकर्त्यांनी केलेल्या तोडफोडीचे तुम्ही समर्थन करता का? या प्रश्नाचं उत्तर देताना एकनाथ शिंदे यांनी सांगितलं की, 'मी कधीही तोडफोडीचे समर्थन करत नाही पण आरोप करताना समोरच्या व्यक्तीने हे देखील लक्षात ठेवले पाहिजे की तो कोणत्या पातळीवर आरोप करत आहे. कार्यकर्त्यांनी जे केले ते एखाद्या कृतीची प्रतिक्रिया आहे. मी एक संवेदनशील आणि सहनशील कार्यकर्ता आहे, पण तुम्ही माझ्याइतके सहनशील असू शकत नाही.'
कुणाल कामराला मुंबई पोलिसांकडून समन्स –
दरम्यान, एकनाथ शिंदे यांच्याविरुद्ध अपमानास्पद टिप्पणी केल्याबद्दल मुंबई पोलिसांनी कुणाल कामरा यांना नोटीस बजावली आहे आणि त्यांना हजर राहण्यास सांगितले आहे. मिळालेल्या माहितीनुसार, कुणाल कामरा महाराष्ट्राबाहेर आहे. त्यामुळे त्यांना व्हॉट्सअॅपवर समन्सही पाठवण्यात आले असून कुणाल कामराच्या घरी नोटीसची प्रत्यक्ष प्रतही औपचारिकरित्या पाठवण्यात आली आहे.
