अमेरिकेचे राष्ट्राध्यक्ष डोनाल्ड ट्रम्प यांनी पुन्हा एकदा जागतिक व्यापार क्षेत्रात खळबळ उडवणारा निर्णय जाहीर केला आहे. अमेरिकेच्या सर्वोच्च न्यायालयाने काही शुल्कांना बेकायदेशीर ठरवल्यानंतर अवघ्या एका दिवसात ट्रम्प यांनी जागतिक टॅरिफ १५ टक्क्यांपर्यंत वाढवण्याची घोषणा केली. या निर्णयामुळे भारतासह अनेक देशांच्या अर्थकारणावर परिणाम होण्याची शक्यता व्यक्त केली जात आहे.
नुकताच सुप्रीम कोर्ट ऑफ द युनायटेड स्टेट्सने ट्रम्प प्रशासनाने लागू केलेल्या काही टॅरिफबाबत महत्त्वपूर्ण निरीक्षण नोंदवले होते. न्यायालयाने 1977 मधील आपत्कालीन आर्थिक अधिकार कायद्याच्या आधारे लादण्यात आलेल्या शुल्कांवर प्रश्नचिन्ह उपस्थित करत, राष्ट्राध्यक्षांनी अधिकारांचा अतिरेक केल्याचे मत व्यक्त केले. या निर्णयानंतर संबंधित शुल्कांमध्ये कपात होण्याची चिन्हे दिसत असतानाच ट्रम्प यांनी नवा निर्णय जाहीर केला.
ट्रम्प यांनी त्यांच्या सोशल मीडिया प्लॅटफॉर्म ट्रुथ सोशलवर पोस्ट करत जागतिक कर 15 टक्क्यांपर्यंत वाढवण्याचा इशारा दिला. त्यांनी स्पष्ट केले की, हा निर्णय अमेरिकन उद्योगांचे संरक्षण करण्यासाठी आणि अन्याय्य व्यापार पद्धतींना उत्तर देण्यासाठी आवश्यक आहे. अनेक देशांनी दशकानुदशके अमेरिकेच्या बाजारपेठेचा फायदा घेतला असल्याचा आरोपही त्यांनी केला.
US President Donald Trump posts – "…I, as President of the United States of America, will be, effective immediately, raising the 10% Worldwide Tariff on Countries, many of which have been “ripping” the U.S. off for decades, without retribution (until I came along!), to the… pic.twitter.com/kFZQJiJNnq — ANI (@ANI) February 21, 2026
या नव्या निर्णयाचा सर्वाधिक परिणाम अमेरिकेसोबत मोठ्या प्रमाणात व्यापार करणाऱ्या देशांवर होऊ शकतो. भारत, चीन, युरोपियन देश तसेच आशियातील निर्यातप्रधान अर्थव्यवस्था असलेल्या राष्ट्रांवर दबाव वाढण्याची शक्यता आहे. अमेरिकन बाजारपेठेत प्रवेश महाग झाल्यास निर्यातीवर परिणाम होऊ शकतो, ज्याचा थेट फटका उद्योग आणि रोजगार क्षेत्राला बसू शकतो.
तज्ज्ञांच्या मते, हा निर्णय केवळ आर्थिकच नव्हे तर राजनैतिक पातळीवरही तणाव वाढवू शकतो. अमेरिका शुल्क वाढवत असल्यास इतर देशही प्रत्युत्तरादाखल अमेरिकन वस्तूंवर टॅरिफ लादू शकतात. अशा परिस्थितीत जागतिक व्यापारयुद्धाची शक्यता पुन्हा निर्माण होऊ शकते. यापूर्वीही अशा निर्णयांमुळे जागतिक बाजारपेठेत अस्थिरता निर्माण झाली होती.
ट्रम्प प्रशासनाने पुढील काही महिन्यांत कायदेशीरदृष्ट्या वैध अशा नव्या धोरणांची अंमलबजावणी करण्याचे संकेत दिले आहेत. त्यामुळे येत्या काळात अमेरिकेचे व्यापार धोरण अधिक आक्रमक होण्याची शक्यता वर्तवली जात आहे.सर्वोच्च न्यायालयाच्या निर्णयानंतर लगेचच टॅरिफ वाढीची घोषणा करून ट्रम्प यांनी जागतिक स्तरावर स्पष्ट संदेश दिला आहे. या निर्णयाचे दूरगामी परिणाम काय होतील, याकडे आता संपूर्ण जगाचे लक्ष लागले आहे.
