उत्तर प्रदेशमधील देवरिया जिल्ह्यातून माणुसकीला काळीमा फासणारी एक अत्यंत संतापजनक आणि क्रूर घटना समोर आली आहे. एका महिला पोलिसाच्या 13 वर्षीय चिमुकल्या मुलीवर तिच्याच सावत्र बापाने बलात्कार केल्याची धक्कादायक घटना उघडकीस आली असून, यामुळे संपूर्ण देशात संतापाची लाट उसळली आहे. संरक्षणाची जबाबदारी असलेल्या घरातच जेव्हा भक्षक जन्माला येतो, तेव्हा समाज सुन्न होतो, असाच काहीसा प्रकार येथे घडला आहे.
पीडित मुलगी सातवीत शिकत असून ती देवरिया येथे आपल्या पोलीस दलात कार्यरत असलेल्या आई आणि सावत्र वडिलांसोबत राहत होती. 25 डिसेंबरला नराधम सावत्र बापाने घराच्या बंद दाराआड या चिमुकल्या जीवावर अत्याचार केला. भीतीच्या छायेत वावरणाऱ्या मुलीने ही भयंकर हकीकत शाळेत आपल्या एका जिवलग मैत्रिणीला सांगितली. मैत्रिणीने तातडीने ही बाब शाळेतील शिक्षिकेच्या कानावर घातली, ज्यामुळे या गुन्ह्याला वाचा फुटली.
शाळेच्या शिक्षिकेने या प्रकरणाचे गांभीर्य ओळखून तातडीने स्थानिक पोलिसांशी संपर्क साधला. आपल्याच पोटच्या मुलीसारख्या असणाऱ्या मुलीवर पतीनेच अत्याचार केल्याचे समजताच पोलीस आईच्या पायाखालची जमीन सरकली. तिने कोणतीही दयामाया न दाखवता थेट पोलीस ठाण्यात धाव घेत नराधम पतीविरोधात गुन्हा दाखल केला. देवरिया पोलिसांनी तातडीने चक्र फिरवून काही तासांतच आरोपीला बेड्या ठोकल्या असून त्याची कसून चौकशी केली जात आहे.
या घटनेने पुन्हा एकदा महिला आणि मुलींच्या सुरक्षेचा प्रश्न ऐरणीवर आणला आहे. ज्या मातेचे आयुष्य इतरांना सुरक्षा देण्यात जात आहे, तिचीच चिमुकली स्वतःच्या घरात सुरक्षित नसावी, ही मोठी शोकांतिका आहे. पीडित मुलगी सध्या धक्क्यात असून तिच्यावर वैद्यकीय उपचार आणि समुपदेशन सुरू आहे. नराधम बापाला कठोरतम शिक्षा मिळावी, अशी मागणी सर्व स्तरांतून केली जात आहे.
समाज म्हणून आपण कुठे चाललो आहोत? रक्ताच्या नात्याला आणि विश्वासाला काळिमा फासणाऱ्या अशा घटनांनी माणुसकी पुन्हा एकदा शरमेने मान खाली घालत आहे. त्या चिमुकल्या जीवाला न्याय मिळवून देण्यासाठी आता पोलीस प्रशासन आणि न्यायव्यवस्था कशी पावले उचलते, याकडे सर्वांचे लक्ष लागले आहे.
