एकनाथ शिंदे यांच्या सहित ४० आमदारांच्या बंडाला आज २० जून रोजी १ वर्ष पूर्ण झालं. मागच्या वर्षी आजच्याच दिवशी विधान परिषद निवडणुकीनंतर शिवसेनेचे आमदार उद्धव ठाकरेंची साथ सोडून एकनाथ शिंदे यांच्याबरोबर सुरत आणि मग गुवाहाटीला गेले. आणि महाविकास आघाडी सरकार पाडण्यात आल. आज या घटनेला १ वर्ष पूर्ण झालं असून या पार्श्वभूमीवर २० जून हा दिवस जागतिक गद्दार दिन म्हणून साजरा करावा अशी मागणी शिवसेना खासदार संजय राऊत यांनी केली आहे. याबाबतचे पत्र त्यांनी थेट संयुक्त राष्ट्र संघटनेला लिहिले आहे.
महोदय, २० जून हा जागतिक गद्दार दिन म्हणून पाळण्यात यावं असं आवाहन करत मी तुम्हाला पत्र लिहीत आहे. सर, मी शिवसेना (उद्धव बाळासाहेब ठाकरे) नावाच्या पक्षाचे प्रतिनिधित्व करतो आणि भारतातील वरिष्ठ सभागृहाचा खासदार आहे. माझा पक्ष शिवसेना (UBT) हा पश्चिम भारतातील एक प्रमुख राज्य असलेल्या महाराष्ट्राचा आहे. शिवसेना या पक्षाची सुरुवात श्री. बाळासाहेब ठाकरे यांनी 1966 मध्ये केली होती, ज्यांनी मुंबईतील स्थानिक तरुणांना मदत केली.
20 जून रोजी एकनाथ शिंदे आणि इतर ५० आमदार मुंबईहून शेजारच्या गुजरात राज्यात गेले आणि इथूनच बंडखोरीला सुरुवात झाली. त्यांनी उद्धव ठाकरे यांची साथ सोडली जे खरं तर त्यावेळी आजारी होते. उद्धव ठाकरे यांच्यावर १२ नोव्हेंबर आणि १९ नोव्हेंबर २०२१ रोजी दोन मोठ्या शस्त्रक्रिया झाल्या. याचाच गैरफायदा या प्रत्येक आमदाराने घेतला. त्यामुळे ज्याप्रकारे २१ जून हा जागतिक योग दिन म्हणून पाळला जातो त्याप्रमाणे २० जून हा दिवस जागतिक गद्दार दिन म्हणून साजरा करण्याचे आवाहन मी तुम्हाला करत आहे. असं संजय राऊत यांनी आपल्या पत्रात म्हंटल.
