शिर्डी : नागपूर-मुंबई समृद्धी महामार्गावर दोन तासांपूर्वी एक मोठा अपघात घडला. आयशर टेम्पो जो केमिकल वाहतूक करत होता, त्याने पेट घेतला. ही घटना समृद्धी महामार्गाच्या शिर्डी टोल नाका जवळ घडली. आग लागल्याची माहिती मिळताच, शिर्डी अग्निशामक विभाग, कोपरगाव अग्निशामक विभाग आणि साई संस्थान अग्निशामक विभाग यांनी त्वरित आग विझवण्याचे प्रयत्न सुरू केले.
अग्निशामक विभागाने आग विझवली असली तरी, प्रारंभिक माहितीप्रमाणे केमिकल वाहतूक करणाऱ्या टेम्पोने पुन्हा पेट घेतला आहे. आग लागण्याचे कारण अस्पष्ट आहे, मात्र इतर गाड्यांच्या पास होण्यासाठी पोलीसांनी नागपूरहून मुंबईकडे जाणाऱ्या वाहने दोन किलोमीटर आधी थांबवली होती. आग लागल्यानंतर, टेम्पो चालकाने तात्काळ टेम्पो थांबवून, त्यातून उडी घेतली आणि त्यामुळे मोठा धोका टळला.
जय महाराष्ट्र न्यूजच्या थेट संपर्कात राहण्यासाठी व्हॉट्सअप चॅनेल वर क्लिक करा.
अग्निशामक दलाचा उशीर
समृद्धी महामार्गावर टोल नाक्यावर अग्निशामक दल नसल्याने आग विझवण्यासाठी अग्निशामक यंत्रणा एक तास उशिरा पोहोचली. मात्र, त्यानंतर दोन अग्निशामक वाहनांच्या मदतीने आग विझवण्याचे शर्तीचे प्रयत्न सुरू होते.
समृद्धी महामार्गाच्या सुरक्षेचा प्रश्न
सुदैवाने, या आगीत कुठलीही जीवित हानी झाली नाही, मात्र या घटनेने समृद्धी महामार्गाच्या सुरक्षेचा प्रश्न पुन्हा ऐरणीवर आणला आहे. या महामार्गावर वाढलेल्या ट्रॅफिक आणि हाय-रिस्क वाहतूक व्यवस्थेच्या पार्श्वभूमीवर, आणखी सावधगिरी बाळगण्याची आवश्यकता आहे. आग लागल्यानंतर त्वरित उपाययोजना करणे आवश्यक आहे. तसेच, टोल नाक्यांवर अग्निशामक यंत्रणा उपलब्ध करणे हा महत्वाचा मुद्दा पुन्हा एकदा समोर आला आहे.
