ST Bus Accident : गुजरातच्या सुरत जिल्ह्यातील बारडोली तालुक्यात असलेल्या ‘उवा’ गावाजवळ एक अत्यंत हृदयद्रावक आणि मोठी दुर्घटना घडली आहे. महाराष्ट्र राज्य रस्ते परिवहन महामंडळाच्या (MSRTC) दोन बसचा भीषण अपघात झाला आहे. या अंगावर काटा आणणाऱ्या अपघातात तब्बल 7 प्रवाशांचा जागीच मृत्यू झाला असून, इतर 10 हून अधिक जण गंभीर जखमी झाले आहेत. प्राथमिक अंदाजानुसार, अपघाताची तीव्रता इतकी भयानक होती की, धडक बसताच एक बस महामार्गावरच उलटली आणि तिने तात्काळ पेट घेतला. या आगीच्या भक्ष्यस्थानी पडल्याने सहा ते आठ प्रवाशांना आपले प्राण गमवावे लागले आहेत.
नेमकी धडक कशी झाली? तांत्रिक तपास सुरू
अपघाताच्या भीषणतेबद्दल माहिती देताना बारडोली ग्रामीण पोलीस ठाण्याचे निरीक्षक पी. एन. जडेजा यांनी सांगितले की, “दुर्घटनाग्रस्त झालेल्या दोन्ही बस या महाराष्ट्र शासनाच्या परिवहन महामंडळाच्या आहेत. या दोन्ही वाहनांमध्ये समोरासमोर धडक झाली की, एकाच दिशेने जात असताना मागून धडक बसली, याबाबतचे नेमके चित्र अद्याप स्पष्ट झालेले नाही. मात्र, अपघातानंतर अवघ्या काही सेकंदांत एका बसला लागलेल्या भीषण आगीने रौद्ररूप धारण केले.” आग लागलेल्या बसच्या आत काही प्रवासी अडकल्याची भीती वर्तवण्यात येत असून, त्यांना सुखरूप बाहेर काढण्यासाठी आणि आग आटोक्यात आणण्यासाठी युद्धपातळीवर शर्थीचे प्रयत्न केले जात आहेत.
#WATCH | Surat, Gujarat: Seven people have died so far following a road accident involving two buses on the Gujarat-Maharashtra Highway in the Bardoli Tehsil of Surat district: Rajesh Gadhiya (SP, Surat Rural) (Source: Fire Department) pic.twitter.com/wwgRsrBzkm — ANI (@ANI) June 2, 2026
तापी आणि सुरतचे पोलीस दल घटनास्थळी
या भीषण अपघाताची माहिती मिळताच सुरत आणि शेजारील तापी जिल्ह्यातील पोलीस प्रशासनाची पथके, अग्निशामक दलाच्या गाड्यांसह तात्काळ घटनास्थळी दाखल झाली. स्थानिक नागरिकांच्या मदतीने पोलिसांनी बस खिडक्या आणि दरवाजे तोडून जखमी प्रवाशांना बाहेर काढले. अपघातातील सर्व जखमींना तातडीने जवळच्या शासकीय आणि खासगी रुग्णालयात उपचारासाठी हलवण्यात आले असून, काहींची प्रकृती चिंताजनक असल्याचे समजते. मदतकार्य अजूनही सुरू असून मृतांचा आकडा वाढण्याची शक्यता वर्तवली जात आहे.
