लसीकरणाच्या वादातून भाजप-शिवसेना कार्यकर्त्यांमध्ये जोरदार हाणामारी झाली. ही घटना बदलापूर-कुळगाव नगरपालिकेच्या दुबे रुग्णालयात घडली. हा हाणामारीचा प्रकार सीसीटीव्हीत कैद झाला आहे.
काही महिन्यांत बदलापूर कुळगाव नगरपरिषदेची निवडणूक होणार आहे. या पार्श्वभूमीवर बदलापूर शहरात सध्या लसीकरण केंद्रांवर सर्वच राजकीय कार्यकर्त्यांमध्ये मोठी चढाओढ पाहायला मिळते आहे. सेना- भाजप कार्यकर्त्यांमध्ये अशाच लसीकरणाच्या वादातून पालिकेच्या दुबे रुग्णालयात जोरदार हाणामारी झाली. या हाणामारीत एका कार्यकर्त्याने दुसऱ्या कार्यकर्त्याच्या डोक्यात लाकडी बाक टाकला. त्यात एक जण जखमी झाला आहे.
याप्रकरणी भाजप – शिवसेना कार्यकर्त्यांकडून बदलापूर पोलीस ठाण्यात परस्परविरोधी गुन्हे दाखल करण्यात आले आहेत. मात्र, अशा प्रकारे लसीकरणावरून राजकीय संघर्ष यापुढेही वाढत जाण्याची शक्यता निर्माण झाली आहे.
