Fishing Ban: ठाणे-पालघर मच्छीमारांसाठी मोठी बातमी! 1 जूनपासून समुद्रात मासेमारी बंद; नियम तोडल्यास होणार कारवाई

Maharashtra Fishing Ban: ठाणे आणि पालघर जिल्ह्यातील मच्छीमारांसाठी महत्त्वाचा निर्णय जाहीर करण्यात आला असून, 1 जूनपासून समुद्रातील मासेमारीवर दोन महिन्यांची बंदी लागू होणार आहे. समुद्रातील मासळीच्या प्रजनन काळाचे संरक्षण आणि पावसाळ्यातील धोकादायक हवामानाच्या पार्श्वभूमीवर शासनाने ही कारवाई केली आहे. यंदाची बंदी 1 जून ते 31 जुलै 2026 या कालावधीत लागू राहणार असल्याची माहिती मत्स्यव्यवसाय विभागाने दिली आहे.

मासळी संवर्धनासाठी निर्णय

मत्स्यव्यवसाय विभागाच्या माहितीनुसार, पावसाळ्यात अनेक समुद्री मासे प्रजनन प्रक्रियेत असतात. या काळात मासेमारीवर नियंत्रण ठेवल्यास समुद्रातील मत्स्यसंपदा वाढण्यास मदत होते. त्याचबरोबर वादळी हवामानामुळे मच्छीमारांच्या सुरक्षेचाही प्रश्न निर्माण होत असल्याने ही बंदी दरवर्षी लागू केली जाते. ठाणे-पालघर मत्स्यव्यवसाय विभागाचे सहाय्यक आयुक्त (तांत्रिक) दिनेश पाटील यांनी सांगितले की, बंदी काळात सर्व प्रकारच्या यांत्रिक आणि यंत्रचलित नौकांना समुद्रात जाण्यास पूर्ण मनाई असेल.

पारंपरिक नौकांना सवलत

शासनाच्या आदेशानुसार, पारंपरिक पद्धतीने मासेमारी करणाऱ्या बिगर-यंत्रचलित नौकांना या बंदीतून सूट देण्यात आली आहे. मात्र, मोठ्या यांत्रिक बोटी आणि ट्रॉलर्सना नियमांचे काटेकोर पालन करावे लागणार आहे. सध्या समुद्रात असलेल्या सर्व यांत्रिक नौकांनी 31 मेपूर्वी बंदरात परतणे बंधनकारक करण्यात आले आहे. 1 जूननंतर कोणत्याही परिस्थितीत समुद्रातून मासे आणून बंदरांवर उतरण्यास परवानगी दिली जाणार नाही, असे प्रशासनाने स्पष्ट केले आहे.

नियम मोडणाऱ्यांवर कठोर कारवाई

बंदी काळात बेकायदेशीर मासेमारी करणाऱ्या नौकांवर महाराष्ट्र सागरी मासेमारी नियमन अधिनियमांतर्गत कठोर कारवाई केली जाणार आहे. नियमांचे उल्लंघन करणाऱ्या नौका, त्यावरील साहित्य आणि पकडलेली मासळी जप्त केली जाऊ शकते. तसेच बंदीच्या काळात समुद्रात जाऊन अपघात झाल्यास संबंधित नौकाधारकांना शासनाकडून कोणतीही आर्थिक मदत किंवा नुकसानभरपाई दिली जाणार नसल्याचेही स्पष्ट करण्यात आले आहे.

हेही वाचा – Marathi Signboards: मुंबई महानगरपालिकेकडून अमराठी नामफलकांवर विशेष कारवाई; 14 मे ते 26 मे दरम्यान हजारो आस्थापनांची होणार तपासणी

मच्छीमारांना प्रशासनाचे आवाहन

मत्स्यव्यवसाय विभागाने सर्व मच्छीमार सहकारी संस्था आणि नौकामालकांना नियमांचे पालन करण्याचे आवाहन केले आहे. प्रशासनाला सहकार्य करून समुद्री जैवसंपत्तीचे संरक्षण करण्यास मदत करावी, असेही विभागाकडून सांगण्यात आले आहे. यामुळे आता 1 जूनपासून ठाणे आणि पालघर किनारपट्टीवर यांत्रिक मासेमारी पूर्णपणे बंद राहणार असून, प्रशासनाकडून समुद्र किनाऱ्यावर विशेष देखरेख ठेवली जाणार आहे.