बंगळुरू: बंगळुरूमध्ये मंगळवारी एक धक्कादायक घटना घडली असून, एका खासगी कंपनीतील 26 वर्षीय कर्मचाऱ्याने इमारतीच्या पाचव्या मजल्यावरून उडी मारून आत्महत्या केल्याचा संशय व्यक्त करण्यात आला आहे. या घटनेमुळे आयटी आणि कॉर्पोरेट क्षेत्रात हळहळ व्यक्त केली जात आहे.
पोलीस माहितीनुसार, मृत कर्मचाऱ्याची ओळख एस. अनंथा कुमार अशी झाली असून तो बनशंकरी परिसरात राहणारा होता. तो Biocon Biologics Limited या कंपनीच्या इलेक्ट्रॉनिक्स सिटी येथील कार्यालयात फायनान्स विभागात कार्यरत होता. मंगळवारी सायंकाळी सुमारे पाच वाजण्याच्या सुमारास ही घटना घडली.
प्राथमिक तपासात असे समोर आले आहे की, अनंथा कुमार मोबाईलवर बोलत असताना कंपनीच्या कॅफेटेरियालगत असलेल्या पाचव्या मजल्यावरील टेरेसवर गेला होता. त्यानंतर त्याने अचानक खाली उडी मारली. घटनेनंतर त्याला तातडीने खासगी रुग्णालयात हलवण्यात आले, मात्र डॉक्टरांनी त्याला मृत घोषित केले.
घटनास्थळी कोणतीही सुसाइड नोट आढळून आलेली नाही, अशी माहिती पोलिसांनी दिली आहे. आत्महत्येमागील नेमके कारण अद्याप स्पष्ट झालेले नसून, या प्रकरणाचा सखोल तपास सुरू असल्याचे पोलिसांनी सांगितले. कर्मचाऱ्यावर कोणताही कामाचा ताण किंवा वैयक्तिक अडचण होती का, याचा तपास केला जात आहे.
दरम्यान, या घटनेवर कंपनीकडूनही प्रतिक्रिया देण्यात आली आहे. Bioconने निवेदनात म्हटले आहे की, “बंगळुरूमध्ये आमच्या एका कर्मचाऱ्याच्या निधनाने आम्हाला अत्यंत दुःख झाले आहे. या कठीण प्रसंगी त्यांच्या कुटुंबीयांप्रती आमच्या मनापासून संवेदना आहेत. प्रकरण सध्या तपासाधीन असल्याने आम्ही तपास यंत्रणांना पूर्ण सहकार्य करत आहोत."
या घटनेमुळे कॉर्पोरेट क्षेत्रातील कर्मचाऱ्यांच्या मानसिक आरोग्याचा मुद्दा पुन्हा एकदा ऐरणीवर आला असून, अशा घटना रोखण्यासाठी कार्यस्थळी मानसिक आरोग्यविषयक आधारव्यवस्था अधिक सक्षम करण्याची गरज व्यक्त केली जात आहे.
