मुंबई: दक्षिण मुंबईच्या नकाशावरील एक महत्त्वाचा दुवा आणि मुंबई सेंट्रल-नागपाडा या भागांना जोडणारा ऐतिहासिक 'बेलासिस रेल्वे उड्डाणपूल' अखेर कात टाकून सज्ज झाला आहे. गेल्या अनेक महिन्यांपासून रखडलेली ही प्रतीक्षा आज, 26 फेब्रुवारी 2026 रोजी संपणार असून या पुलाचे दिमाखदार लोकार्पण होत आहे. 1890 च्या दशकात ब्रिटिशांनी उभारलेला हा पूल आता आधुनिक तंत्रज्ञानाच्या जोरावर नव्याने उभा राहिला असला, तरी या सोहळ्याला स्थानिक रहिवाशांच्या नाराजीची एक गडद किनार लागली आहे.
मुख्यमंत्री देवेंद्र फडणवीस यांच्या हस्ते दूरदृश्य प्रणालीद्वारे या पुलाचे उद्घाटन होणार असून, सोहळ्याला उपमुख्यमंत्री एकनाथ शिंदे, उपमुख्यमंत्री सुनेत्रा पवार आणि महापौर रितू तावडे यांची प्रमुख उपस्थिती लाभणार आहे. दक्षिण मुंबईतील वाहतूक कोंडीचे जाळे भेदण्यासाठी हा पूल निर्णायक ठरणार आहे. या पुलामुळे केवळ मुंबई सेंट्रल स्टेशनच जवळ येणार नाही, तर ताडदेव, महालक्ष्मी आणि पठ्ठे बापूराव मार्गावरील वाहतुकीचा भार तब्बल 50 टक्क्यांनी हलका होणार आहे.
वाहतुकीच्या दृष्टीने हा पूल 'वरदान' ठरणार असला तरी, प्रशासनाच्या 'नव्या आराखड्या'मुळे स्थानिकांच्या पदरी निराशा आली आहे. "जुने ते सोने" म्हणत स्थानिक ज्येष्ठ नागरिकांनी नवीन आराखड्यातील त्रुटींकडे लक्ष वेधले आहे. जुन्या ब्रिटिशकालीन पुलावर प्रवाशांच्या सोयीसाठी बेस्ट बसचे अधिकृत थांबे होते, जे नव्या पुलावरून गायब झाले आहेत. यामुळे मुंबई सेंट्रल स्थानकावर उतरणाऱ्या प्रवाशांना आता बस पकडण्यासाठी लांबची पायपीट करावी लागणार आहे, जी नागरिकांच्या संतापाचे मुख्य कारण ठरत आहे.
केवळ बस थांबेच नव्हे, तर पादचाऱ्यांच्या सुविधेलाही या नवीन रचनेत हरताळ फासल्याचा आरोप होत आहे. जुन्या पुलावर ठिकठिकाणी खाली उतरण्यासाठी पायऱ्यांची सोय होती. मात्र, नव्या आधुनिक पुलावर केवळ वाहनांच्या वेगाचा विचार करण्यात आला असून, पादचाऱ्यांसाठी सोयीस्कर 'एन्ट्री' आणि 'एक्झिट' पॉईंट्स ठेवण्यात आलेले नाहीत. "आम्हाला पुलाच्या एका टोकापासून दुसऱ्या टोकापर्यंत विनाकारण चालत जावे लागेल," अशी व्यथा परिसरातील ज्येष्ठ नागरिकांनी मांडली आहे. विकास हा माणसांसाठी असावा, केवळ सिमेंटच्या बांधकामासाठी नसावा, असा सूर आता उमटत आहे.
रेल्वे सुरक्षा नियम आणि तांत्रिक निकषांमुळे आराखड्यात काही बदल करावे लागल्याचे प्रशासकीय सूत्रांचे म्हणणे आहे. मात्र, लोकार्पण सोहळ्याच्या झगमगाटात सर्वसामान्यांचे हे प्रश्न दबले जाणार का, हा प्रश्न कायम आहे. वाहतुकीचा वेग वाढला तरी पादचाऱ्यांचा प्रवास खडतर होणार असेल, तर या आधुनिकतेचा उपयोग काय, असा रोकडा सवाल मुंबईकर विचारत आहेत. आता या नाराजीची दखल घेऊन प्रशासन 'यु-टर्न' घेणार की नागरिक आंदोलनाचा पवित्रा स्वीकारणार, याकडे सर्वांचे लक्ष लागले आहे.
