नवी दिल्ली: भारतीय क्रिकेटमधील उल्लेखनीय कामगिरी करणाऱ्या खेळाडूंना गौरवण्यासाठी भारतीय क्रिकेट नियामक मंडळ दरवर्षी आयोजित करत असलेला नमन पुरस्कार 2026 सोहळा यंदा 15 मार्च 2026 रोजी नवी दिल्ली येथे होणार आहे. या पुरस्कार सोहळ्यात सध्याचे खेळाडू, माजी क्रिकेटपटू, प्रशिक्षक आणि पंच यांना विविध श्रेणींमध्ये सन्मानित केले जाते. यंदाच्या पुरस्कारांची घोषणा करण्यात आली असून अनेक भारतीय क्रिकेटपटूंना महत्त्वाचे सन्मान मिळणार आहेत.
भारतीय क्रिकेट नियामक मंडळाच्या घोषणेनुसार भारतीय कसोटी आणि एकदिवसीय संघाचा कर्णधार शुभमन गिल याला पुरुषांमधील सर्वोत्तम आंतरराष्ट्रीय क्रिकेटपटूसाठी दिला जाणारा पॉली उमरीगर पुरस्कार प्रदान करण्यात येणार आहे. विशेष म्हणजे गिलला हा पुरस्कार सलग दुसऱ्या वर्षी मिळणार आहे. तर भारतीय महिला क्रिकेट संघातील स्टार फलंदाज स्मृती मंधाना हिला महिलांमधील सर्वोत्तम आंतरराष्ट्रीय क्रिकेटपटूचा सन्मान मिळणार असून तिच्या कारकिर्दीतील हा पाचवा असा गौरव ठरणार आहे.
देशांतर्गत क्रिकेटमधील कामगिरीसाठीही काही खेळाडूंना सन्मानित केले जाणार आहे. मुंबईची ईरा जाधव हिला देशांतर्गत महिला क्रिकेटमधील सर्वोत्तम खेळाडूसाठी जगमोहन डालमिया ट्रॉफी दिली जाईल. तर हरियाणाची शेफाली वर्मा हिला वरिष्ठ महिला एकदिवसीय स्पर्धेत सर्वोत्तम कामगिरीसाठी हीच ट्रॉफी प्रदान केली जाणार आहे.
या पुरस्कार सोहळ्यात माजी क्रिकेटपटू रॉजर बिन्नी, राहुल द्रविड आणि मिताली राज यांना लाइफटाइम अचिव्हमेंट अवॉर्ड देऊन गौरविण्यात येणार आहे.
? News ? BCCI to honour Roger Binny, Rahul Dravid and Mithali Raj with Lifetime Achievement Awards at Naman Awards 2026, scheduled to be held on Sunday, 15 March 2026, in New Delhi. More details ▶️ https://t.co/noBSDbxcW5 pic.twitter.com/WfhfqHBuiI — BCCI (@BCCI) March 14, 2026
पुरुष देशांतर्गत क्रिकेटमध्ये मुंबईचा आयुष म्हात्रे याला मर्यादित षटकांच्या स्पर्धेत सर्वोत्तम अष्टपैलू खेळाडूसाठी लाला अमरनाथ पुरस्कार मिळणार आहे. तर विदर्भचा हर्ष दुबे याला रणजी करंडक स्पर्धेत सर्वोत्तम अष्टपैलू खेळाडूसाठी याच पुरस्काराने गौरविण्यात येणार आहे.
दरम्यान, मुंबई क्रिकेट संघटना ला पुन्हा एकदा भारतीय क्रिकेट नियामक मंडळाच्या देशांतर्गत स्पर्धांमधील सर्वोत्तम कामगिरीसाठी पुरस्कार मिळणार आहे. या हंगामात मुंबईने चार स्पर्धांमध्ये विजेतेपद मिळवले तर दोन स्पर्धांमध्ये उपविजेतेपद पटकावले होते.
यंदाच्या नमन पुरस्कार सोहळ्याचे आणखी एक वैशिष्ट्य म्हणजे पाच आंतरराष्ट्रीय विजेतेपदे जिंकलेल्या भारतीय संघांचा एकत्रित सन्मान केला जाणार आहे. यात आयसीसी चॅम्पियन्स ट्रॉफी 2025 आणि आयसीसी टी-20 विश्वचषक 2026 जिंकणारा सिनिअर पुरुष संघ, आयसीसी महिला क्रिकेट विश्वचषक 2025 जिंकणारा सिनिअर संघ, तसेच आयसीसी अंडर-19 विश्वचषक 2026 जिंकणारा पुरुष संघ आणि आयसीसी अंडर-19 विश्वचषक 2025 जिंकणारा महिला संघ यांचा समावेश आहे. भारतीय क्रिकेटच्या इतिहासात इतक्या मोठ्या संख्येने विजेते संघांचा एकत्र गौरव होण्याची ही पहिलीच वेळ ठरणार आहे.
हेही वाचा: Elon Musk Super App : एलॉन मस्क यांचे आता येणार सुपर ॲप, असणार या खास सुविधा
