काबुल: मध्य आशियात अफगाणिस्तान आणि पाकिस्तान यांच्यातील तणाव दिवसेंदिवस वाढत चालला आहे. जवळपास महिनाभर सुरू असलेल्या या संघर्षानंतरही परिस्थितीत कोणतीही सुधारणा झालेली नाही. उलट दोन्ही देशांमधील तणाव अधिक तीव्र होत असल्याचे दिसत आहे. अफगाणिस्तानने आरोप केला आहे की पाकिस्तानने सोमवारी, 16 मार्च 2026 रोजी उशिरा रात्री काबुलमधील एका व्यसनमुक्ती केंद्रावर हवाई हल्ला केला, ज्यामध्ये 400 हून अधिक लोकांचा मृत्यू झाला आहे.
या हल्ल्यानंतर तालिबान प्रशासनाने तीव्र प्रतिक्रिया व्यक्त केली आहे. तालिबानच्या म्हणण्यानुसार आता पाकिस्तानसोबत चर्चा किंवा कूटनीतीचा मार्ग उरलेला नाही. तालिबानचे प्रवक्ते जबिहुल्ला मुजाहिद यांनी टोलो न्यूजशी बोलताना सांगितले की काबुलमधील काही ठिकाणांवर पाकिस्तानी लष्कराने हल्ले केले आहेत. या घटनांनंतर इस्लामाबादसोबत संवादाचा मार्ग संपला असून आता प्रत्युत्तर देण्याचा विचार केला जात असल्याचे त्यांनी स्पष्ट केले.
मिळालेल्या माहितीनुसार, काबुलमधील व्यसनमुक्ती केंद्रावर पाकिस्तानी सैन्याने एकाच वेळी अनेक बॉम्ब टाकल्याचा आरोप करण्यात आला आहे. हल्ला झाला त्या वेळी केंद्रात सुमारे 2000 लोक उपस्थित होते. त्यापैकी 400 जणांचा मृत्यू झाला असून सुमारे 250 जण गंभीर जखमी झाले आहेत. काही जखमींची प्रकृती अत्यंत गंभीर असल्याने मृतांचा आकडा वाढण्याची भीती व्यक्त केली जात आहे.
या हल्ल्यात व्यसनमुक्ती केंद्राच्या इमारतीचे मोठे नुकसान झाले आहे. स्फोटानंतर लागलेल्या आगीमुळे इमारतीचा मोठा भाग जळून खाक झाला. अफगाण अधिकाऱ्यांच्या मते पाकिस्तानकडून इतर काही ठिकाणांवरही हल्ले करण्यात आले आहेत.
दरम्यान, या दोन देशांमधील तणाव 21 फेब्रुवारी रोजी झालेल्या एका हल्ल्यानंतर अधिक वाढला होता. त्यानंतर अफगाणिस्तान आणि पाकिस्तान यांनी एकमेकांवर अनेक वेळा हल्ले केल्याचे सांगितले जाते. या संघर्षात आतापर्यंत शेकडो लोकांचा मृत्यू झाला असून हजारो नागरिकांना आपली घरे सोडून सुरक्षित ठिकाणी स्थलांतर करावे लागले आहे. परिस्थिती दिवसेंदिवस गंभीर होत असल्याने आंतरराष्ट्रीय स्तरावरही चिंता व्यक्त केली जात आहे.
