जंतरमंतरवरील आंदोलनानंतर चर्चेत आलेले कॉकरोच जनता पार्टीचे संस्थापक अभिजीत दिपके यांच्या प्रकृतीबाबत मोठी माहिती समोर आली आहे. छत्रपती संभाजीनगर येथील निवासस्थानी नागरिकांच्या भेटीगाठी स्वीकारत असताना त्यांची प्रकृती अचानक बिघडली. मळमळ आणि उलटीचा त्रास सुरू झाल्याने त्यांनी भेटीचा कार्यक्रम अर्धवट थांबवून घरी विश्रांती घेतली. सध्या डॉक्टरांच्या देखरेखीखाली त्यांच्यावर घरीच उपचार सुरू आहेत.
जंतर-मंतर आंदोलनामुळे देशभरात चर्चेत
नीट पेपरफुटी प्रकरणात केंद्रीय शिक्षण मंत्री धर्मेंद्र प्रधान यांच्या राजीनाम्याच्या मागणीसाठी कॉकरोच जनता पार्टीने दिल्लीतील जंतर-मंतर येथे मोठे आंदोलन छेडले होते. अमेरिकेतून भारतात परतल्यानंतर अभिजीत दिपके यांनी या आंदोलनाचे नेतृत्व केले होते. अनेक दिवस सुरू राहिलेल्या या आंदोलनाला देशभरातून विविध स्तरांतून पाठिंबा मिळाला. या आंदोलनानंतर केंद्र सरकारवर दबाव वाढला आणि अखेर केंद्रीय शिक्षण मंत्री धर्मेंद्र प्रधान यांनी राजीनामा दिला. त्यानंतर आंदोलन मागे घेण्यात आले.
आंदोलनानंतर प्रकृतीवर झाला परिणाम
दीर्घकाळ आंदोलनात सहभागी राहिल्यामुळे अभिजीत दिपके यांच्या प्रकृतीवर परिणाम झाला होता. त्यांच्यावर उपचारही सुरू होते. प्रकृतीत सुधारणा झाल्यानंतर ते काही दिवसांपूर्वी छत्रपती संभाजीनगर येथील आपल्या घरी परतले होते. त्यांच्या भेटीसाठी मोठ्या संख्येने नागरिक येत असून, ते त्यांच्याशी संवादही साधत होते.
संवादादरम्यान प्रकृती अचानक बिघडली
नागरिकांशी चर्चा सुरू असतानाच अभिजीत दिपके यांना अचानक मळमळ आणि उलटीचा त्रास जाणवू लागला. त्यामुळे त्यांनी भेटीचा कार्यक्रम तातडीने थांबवला आणि उर्वरित नागरिकांना न भेटताच घरात परतले. सध्या डॉक्टर त्यांच्या प्रकृतीवर लक्ष ठेवून असून, घरीच आवश्यक उपचार सुरू असल्याची माहिती मिळत आहे.
