मुंबई, १९ एप्रिल २०२४, प्रतिनिधी : नाशिक लोकसभा मतदारसंघातून कोण निवडणूक लढणार यावरून महायुतीमध्ये निर्माण झालेला पेच सुटला आहे. राष्ट्रवादी काँग्रेसचे नेते छगन भुजबळ यांनी लोकसभा निवडणुकीच्या रिंगणातून माघार घेतल्याचे जाहीर केले. पत्रकार परिषद घेऊन भुजबळांनी ही घोषणा केली. भुजबळांच्या माघारीने मराठे सुखावले आणि ओबीसी दुखावले आहेत.
मराठ्यांना आर्थिक आणि सामाजिकदृष्ट्या मागास म्हणून आरक्षण दिले आहे तर ओबीसीमधून सरसकट आरक्षण देऊ नये, अशी भूमिका भुजबळांनी घेतली होती. भुजबळांच्या या भूमिकेमुळे काही मराठे दुखावले होते. पण भुजबळांनी लोकसभा निवडणुकीच्या रिंगणातून माघार घेतल्यामुळे मराठे सुखावले आहेत. तर ओबीसींचे नेते म्हणून ओळखले जाणारे भुजबळ लोकसभेत जाणार नसल्यामुळे ओबीसी दुखावले आहेत.
छगन भुजबळ यांनी माघार घेतल्यामुळे आता नाशिक लोकसभा मतदारसंघातून शिवसेनेच्या तिकिटावर हेमंत गोडसे उभे राहण्याची शक्यता वाढली आहे. गोडसे सध्या नाशिकचे खासदार आहेत आणि ते पुन्हा निवडणूक लढवण्यास इच्छुक आहेत. त्यांना महायुतीकडून उमेदवारी मिळणार की नाही हे लवकरच स्पष्ट होईल. सूत्रांनी दिलेल्या माहितीनुसार शनिवारपर्यंत शिवसेना नाशिकच्या उमेदवाराबाबतचा निर्णय घेणार आहे.
