मुंबई, २७ सप्टेंबर २०२३, प्रतिनिधी: मध्य रेल्वेची लोकलसेवा अधिक वक्तशीर व्हावी यासाठी दादर फलाट क्रमांक पाचवरून ठाणे व कल्याणसाठी धीम्या आणि जलद नव्या लोकल फेऱ्या चालवण्याची चाचपणी मध्य रेल्वेने सुरू केली आहे. यामुळे नव्या वर्षात लोकलच्या वक्तशीरपणात सुधारणा होण्याची आशा आहे.
दादर स्थानकातील गर्दी नियोजनासाठी दोन टप्प्यांत काम करण्याचे नियोजन आहे. त्यानुसार फलाट क्रमांक एकच्या विस्तारीकरणाचे पहिल्या टप्प्यातील काम सुरू करण्यात आले आहे. हे काम दोन महिन्यांत पूर्ण करण्याचे नियोजन आहे. त्यानंतर दुसऱ्या टप्प्याचे अर्थात, फलाट क्रमांक चार दुतर्फा करण्याचे काम हाती घेण्यात येणार आहे. कल्याण दिशेला जाणाऱ्या जलद लोकल फलाट क्रमांक चारवरून धावतात. फलाट क्रमांक सहावरून सीएसएमटीला जाणाऱ्या गाड्या धावतात. फलाट क्रमांक पाच ही लूप मार्गिका आहे. छत्रपती शिवाजी महाराज टर्मिनवरून सुटणाऱ्या सुमारे २१ मेल-एक्स्प्रेस फलाट क्रमांक पाचवरून धावतात. एका मेल-एकस्प्रेसला सरासरी पाच ते सहा मिनिटांचा वेळ लागतो. फलाट क्रमांक चार दुतर्फा केल्यानंतर मेल-एक्स्प्रेसला पर्यायी मार्ग उपलब्ध होणार आहे. परिणामी फलाट क्रमांक पाचवरून ठाणे, कल्याण दिशेसाठी जलद आणि धीम्या लोकल चालवणे शक्य होणार आहे, अशी माहिती रेल्वेच्या वरिष्ठ अधिकाऱ्यांनी दिली.
गर्दीची वेळ वगळता अन्य वेळी लोकलमधील बहुतांश प्रवासी दादर स्थानकातच उतरत असल्याचे दिसून आले आहे. यामुळे दादर स्थानकातून जलद आणि धीम्या लोकल चालवण्यासाठी सध्याच्या मेल-एक्स्प्रेस वाहतुकीला पर्यायी मार्गिका उपलब्ध करण्याचे आव्हान आहे, असेही रेल्वे अधिकाऱ्यांनी स्पष्ट केले. दादर स्थानकातील फलाट क्रमांक पाचचा वापर पूर्ण क्षमतेने होत नाही. फलाट क्रमांक चारचे काम पूर्ण झाल्यानंतर लोकल फेऱ्या चालवण्यासाठी तसेच लोकलच्या वक्तशीरपणासाठी अतिरिक्त जागा होणेदेखील शक्य होणार आहे.
दादर फलाट क्रमांक दोनवरून ठाणे, कल्याण धीम्या मार्गासाठी अप आणि डाउन लोकल सुरू होत्या. फलाट क्रमांक एकच्या विस्तारीकरणासाठी फलाट क्रमांक दोनवरील वाहतूक बंद करण्यात आली आहे. शहरातील मध्यवर्ती ठिकाण, बाजारपेठा यामुळे दादरमध्ये नेहमी गर्दी असते. सीएसएमटीहून येणाऱ्या लोकलमध्ये अवजड बॅगांसह प्रवेश करणे अडचणीचे ठरते. यामुळे फलाट क्रमांक पाचवरून जलद-धीम्या लोकल सुरू झाल्यानंतर रेल्वे प्रवाशांना मोठा दिलासा मिळण्याची शक्यता आहे.
