नवी मुंबई, १३ सप्टेंबर २०२३, प्रतिनिधी: जलशुद्धीकरण केंद्राच्या देखभाल दुरुस्तीसह इतर कामांसाठी द्रोणागिरी, जेएनपीटी, उलवे, खारघर आणि तळोजा नोडमध्ये शुक्रवार, १५ सप्टेंबर रोजी सकाळी ९ ते शनिवार, १६ सप्टेंबरपर्यंत पाणीकपात करण्यात आली आहे. शहर आणि औद्योगिक विकास महामंडळ हेटवणे जलशुद्धीकरण केंद्र, धरणाचा नाला आणि जलवाहिनीची देखभाल आणि दुरुस्ती करणार आहे. त्यामुळे सिडकोच्या हेटवणे मार्गावरील सर्व गावांना तसेच द्रोणागिरी, जेएनपीटी, उलवे, खारघर, तळोजा नोड्समध्ये पाणीपुरवठा होणार नाही.
येत्या २४ तासांसाठी १६ सप्टेंबरपासून कमी दाबाने पाणीपुरवठा सुरू होणार आहे. सिडकोने बाधित भागातील नागरिकांनी पाण्याची साठवणूक करून काटकसरीने वापर करण्याचे आवाहन केले आहे.
