Global Health Emergency: इबोला विषाणूचा प्रसार आफ्रिकेतील अनेक देशांमध्ये झपाट्याने झाला असून, तो मानवी जीवनासाठी अत्यंत गंभीर धोका निर्माण करत आहे. या भीषण परिस्थितीचा अंदाज घेत जागतिक आरोग्य संघटनेने (WHO) 'जागतिक आरोग्य आणीबाणी' (Global Health Emergency) जाहीर केली आहे. WHO ची ही सूचना प्राप्त झाल्यानंतर, भारतातील नागरी विमानन महासंचालनालयाने (DGCA) सर्व विमानतळांसाठी 'प्रमाणित कार्यपद्धती' (SOPs) म्हणजेच नवीन नियमावली जारी केली आहे. या मार्गदर्शक तत्त्वांनुसार, कोविड-19 महामारीच्या काळात पाळल्या जाणाऱ्या प्रोटोकॉल्सप्रमाणेच आताही कडक नियमांचे पालन करणे सर्वांसाठी अनिवार्य करण्यात आले आहे.
20 हून अधिक विमान कंपन्यांना विशेष निर्देश; प्रवाशांना 'स्व-घोषणा पत्र' भरणे बंधनकारक
नवीन नियमांनुसार, युगांडा आणि काँगो या आफ्रिकन देशांशी थेट किंवा अप्रत्यक्ष विमानसेवा असलेल्या सर्व विमान कंपन्यांना विशेष निर्देश जारी करण्यात आले आहेत. त्यानुसार, त्यांनी प्रवाशांकडून भारतात उतरण्यापूर्वी 'स्व-घोषणा पत्र' (self-declaration form) भरून घ्यावे आणि ती पत्रे केंद्रीय आरोग्य मंत्रालयाकडे सादर करावीत. एअर इंडिया, इंडिगो, अकासा एअर, एमिरेट्स, एअर फ्रान्स, एतिहाद एअरवेज आणि इजिप्तएअर यांसारख्या विमान कंपन्यांची काँगोशी, तर एअर इंडिया, इंडिगो आणि KLM सह एकूण 17 विमान कंपन्यांची युगांडाशी थेट किंवा कनेक्टिंग विमानसेवा उपलब्ध आहे.
विमानात मास्क आणि PPE किट्स अनिवार्य; संशयित रुग्णांसाठी विशेष नियम
विमान कंपन्यांना विमानामध्ये प्रवाशांसाठी सातत्याने उद्घोषणा करण्याचे आदेश देण्यात आले आहेत. प्रवासादरम्यान ताप, अशक्तपणा, स्नायूंचे दुखणे, डोकेदुखी, घसा खवखवणे, उलट्या, जुलाब, अंगावर पुरळ किंवा अंतर्गत रक्तस्राव यांसारखी लक्षणे आढळल्यास प्रवाशांनी त्वरित विमान कर्मचाऱ्यांना कळवणे गरजेचे आहे. अशी लक्षणे दिसल्यास संबंधित प्रवाशाला विमानातील सर्वात मागील भागात आयसोलेट केले जाईल आणि त्याच्या आजूबाजूची आसने रिकामी ठेवली जातील. याशिवाय, सर्व विमानांच्या फर्स्ट-एड किट्समध्ये 3-पदरी मास्क, विल्हेवाट लावण्याजोगे हातमोजे (disposable gloves), PPE किट्स आणि सॅनिटायझर्सचा समावेश करणे अनिवार्य करण्यात आले आहे.
हेही वाचा – Oxytocin Injection Ban: प्रसूतीदरम्यान वापरल्या जाणाऱ्या ऑक्सिटोसिन इंजेक्शनवर बंदी; मोठ कारण आलं समोर
युगांडामध्ये यापूर्वी इबोलामुळे 11,000 लोकांचा मृत्यू; काय आहे या विषाणूचा इतिहास?
इबोला विषाणूचा इतिहास अत्यंत भयानक आणि जीवघेणा राहिला आहे. आफ्रिकन राष्ट्र असलेल्या युगांडामध्ये हा विषाणू सर्वप्रथम 2000 साली समोर आला होता. त्यानंतर, 2014 ते 2016 या कालावधीत इबोलाने संपूर्ण पश्चिम आफ्रिकेत प्रचंड हाहाकार माजवला होता, ज्यामध्ये तब्बल 11,000 हून अधिक लोकांना आपला जीव गमवावा लागला होता. या विषाणूची सर्वप्रथम ओळख 1976 मध्ये पटली होती. त्यावेळी दक्षिण सुदान आणि काँगो या प्रदेशांमधील 'इबोला' नदीच्या परिसरात या विषाणूचा पहिला मोठा उद्रेक झाला होता, ज्यामुळे या रोगाला इबोला असे नाव देण्यात आले आहे.
