अमेरिकेचे राष्ट्राध्यक्ष डोनाल्ड ट्रम्प यांच्या उपस्थितीत आयोजित करण्यात आलेल्या व्हाइट हाऊस कॉरेस्पोंडेंट्स डिनर दरम्यान शनिवारी (26 एप्रिल 2026) रात्री अचानक गोंधळ उडाला. कार्यक्रम सुरू असतानाच जोरदार स्फोटासारख्या आवाजांचा धडाका ऐकू आल्याने सुरक्षा यंत्रणा तात्काळ सतर्क झाली. या घटनेमुळे काही काळासाठी भीतीचे वातावरण निर्माण झाले.
घटनेनंतर सीक्रेट सर्व्हिसचे अधिकारी आणि इतर सुरक्षा कर्मचारी बँक्वेट हॉलमध्ये धावत पोहोचले. वृत्तसंस्थांच्या माहितीनुसार, अधिकाऱ्यांनी गर्दीतून मार्ग काढत डायसकडे धाव घेतली आणि लोकांना बाजूला होण्याचे आदेश दिले. काही अहवालांमध्ये गोळीबार झाल्याची शक्यता व्यक्त करण्यात आली असली, तरी याबाबत अधिकृत पुष्टी अद्याप झालेली नाही.
सुरक्षेच्या दृष्टीने राष्ट्राध्यक्ष ट्रम्प, फर्स्ट लेडी मेलानिया ट्रम्प तसेच इतर वरिष्ठ नेत्यांना तत्काळ सुरक्षित स्थळी हलवण्यात आले. सोशल मीडियावर काही व्हिडिओ समोर आले असून त्यामध्ये मोठ्या आवाजांचा उल्लेख आहे, मात्र या व्हिडिओंची स्वतंत्र पडताळणी झालेली नाही.
घटनेनंतर परिसर तात्काळ बंदोबस्तात घेण्यात आला आणि उपस्थित पाहुण्यांना बाहेर काढण्यात आले. वृत्तानुसार, या प्रकरणात एका संशयित व्यक्तीला ताब्यात घेण्यात आले आहे. तरीही आवाजांचे नेमके कारण काय होते, हे अद्याप स्पष्ट झालेले नाही आणि तपास सुरू आहे.
#WATCH | ANI Reporter Reena Bhardwaj’s exclusive report from White House Correspondent’s dinner. She says, "Just minutes ago, chaos erupted here in the ballroom at the Hilton in Washington. What I witnessed first hand was a loud sound first. To my mind it was probably clattering… pic.twitter.com/XJpXmYONbN — ANI (@ANI) April 26, 2026
दरम्यान, या कार्यक्रमात उपराष्ट्राध्यक्ष जेडी व्हान्स यांच्यासह अनेक कॅबिनेट मंत्री आणि वरिष्ठ अधिकारी उपस्थित होते. प्रशासनाकडून सर्व सदस्य सुरक्षित असल्याची माहिती देण्यात आली आहे. कोणतीही जीवितहानी झाल्याचे वृत्त नाही.
विशेष म्हणजे, राष्ट्राध्यक्ष म्हणून ट्रम्प यांचा हा या कार्यक्रमातील पहिलाच सहभाग होता. सामान्यतः मीडिया, राजकारण आणि मनोरंजन क्षेत्रातील मान्यवर एकत्र येणाऱ्या या कार्यक्रमात यंदा आधीपासूनच चर्चेचे वातावरण होते. मात्र या अचानक घडलेल्या घटनेमुळे सुरक्षा व्यवस्थेवर प्रश्नचिन्ह उपस्थित झाले असून पुढील तपासाकडे सर्वांचे लक्ष लागले आहे.
