Ramadan 2026 Calendar: भारतात उद्यापासून सुरू होतोय रमजानचा महिना, जाणून घ्या उपवास अन् सेहरी-इफ्तारची वेळ

Ramadan 2026 Calendar: मुस्लिम बांधवांसाठी अत्यंत पवित्र आणि आदराचा मानला जाणारा रमजान महिना यंदा 18 फेब्रुवारीपासून सुरू होण्याची शक्यता आहे. इस्लामिक कॅलेंडरमधील हा नववा महिना अल्लाहची इबादत, आत्मसंयम आणि प्रार्थनेसाठी समर्पित असतो. या काळात मुस्लिम समुदाय सूर्योदयापासून सूर्यास्तापर्यंत अन्न-पाण्याविना कडक उपवास (रोजा) पाळतात.

भारतात चंद्रदर्शन आणि पहिल्या रोजाची तारीख
दरम्यान, बुधवार, 18 फेब्रुवारी 2026 रोजी भारतीय प्रमाणवेळेनुसार संध्याकाळी 6:15 ते 6:45 दरम्यान भारताच्या अनेक भागांत चंद्रकोर दिसण्याची दाट शक्यता आहे. जर आज रात्री चंद्रदर्शन झाले, तर उपवासाचा पहिला दिवस गुरुवार, 19 फेब्रुवारी 2026 रोजी असेल. मात्र, काही कारणास्तव आज चंद्र दिसला नाही, तर शाबान महिना 30 दिवसांचा होऊन रमजान महिन्याची अधिकृत सुरुवात 20 फेब्रुवारीपासून होईल.

रमजानचे धार्मिक महत्त्व
रमजान हा केवळ उपवासाचा महिना नसून तो आध्यात्मिक शुद्धीकरणाचा काळ मानला जातो. या पवित्र महिन्यात अल्लाहचे आशीर्वाद मिळवण्यासाठी मुस्लिम बांधव दिवसातून पाच वेळा नमाज अदा करतात. तसेच मद्यपान, धूम्रपान आणि इतर व्यसनांपासून दूर राहून संयमी जीवन जगण्याचा प्रयत्न करतात. या काळात दानधर्माला देखील विशेष महत्त्व दिले जाते.

सेहरी आणि इफ्तार; महत्त्वाच्या वेळा
रमजानमध्ये सेहरी आणि इफ्तार हे दोन महत्त्वाचे पैलू आहेत. सूर्योदयापूर्वी केल्या जाणाऱ्या जेवणाला 'सेहरी' म्हणतात, ज्यामुळे दिवसभर रोजा पाळण्यासाठी शरीराला ऊर्जा मिळते. तर सूर्यास्ताच्या वेळी उपवास सोडण्याच्या प्रक्रियेला 'इफ्तार' म्हटले जाते. इफ्तारच्या वेळी कुटुंबीय आणि मित्रमंडळी एकत्र येऊन खजूर आणि विविध पदार्थांनी आपला उपवास सोडतात.

हेही वाचा – Chandra Grahan and Holi : 100 वर्षांनंतर दुर्मिळ योगायोग! होळीच्या दिवशी 'ब्लड मून'चं दर्शन; जाणून घ्या भारतात दिसण्याची वेळ, सूतक काळ

रमजान 2026: सुरुवातीच्या दिवसांचे वेळापत्रक

रमजान महिन्याच्या सुरुवातीच्या दिवसांमध्ये उपवासाच्या वेळा अतिशय महत्त्वाच्या असून, पहिल्या दिवशी म्हणजेच 19 फेब्रुवारी 2026 रोजी सेहरीची वेळ सकाळी 05:36 वाजता असेल, तर इफ्तार संध्याकाळी 06:15 वाजता होईल. दुसऱ्या दिवशी, 20 फेब्रुवारी रोजी सेहरी 05:35 आणि इफ्तार 06:16 वाजता निश्चित करण्यात आली आहे. 21 फेब्रुवारी रोजी देखील सेहरीची वेळ 05:35 कायम असून इफ्तार 06:17 वाजता असेल. त्यानंतर 22 फेब्रुवारी रोजी सेहरी सकाळी 05:34 वाजता संपेल आणि इफ्तार संध्याकाळी 06:17 वाजता होईल. 23 फेब्रुवारी रोजी सेहरीची वेळ 05:33 असून इफ्तार संध्याकाळी 06:18 वाजता करून उपवास सोडला जाईल.