सिडनी: ऑस्ट्रेलियातील सिडनी शहराच्या हॉर्न्स्बी उपनगरात शुक्रवारच्या रात्री एक दुर्दैवी अपघात झाला. या घटनेत 33 वर्षीय भारतीय वंशाची आणि आठ महिन्यांची गर्भवती असलेली समन्विता धरेश्वर यांचा मृत्यू झाला. या अपघातासाठी जबाबदार असलेल्या BMW कारच्या चालकाने आता जामिनासाठी अर्ज करण्याची तयारी केली आहे, अशी माहिती स्थानिक माध्यमांनी दिली आहे.
अपघात तेव्हा झाला, जेव्हा एका Kia Carnival कारने फुटपाथ ओलांडणाऱ्या समन्विता आणि त्यांच्या कुटुंबाला जाण्यासाठी स्पीड कमी केला. त्याच वेळी, 19 वर्षांचा आरोन पपाझोग्लू या तरुणाच्या BMW कारने या Kia गाडीला जोरदार धडक दिली. धडक झालेल्या Kia ने पुढे सरकत समन्वितांना जोरदार धडक दिली. घटनास्थळी उपचारानंतर त्यांना तातडीने वेस्टमीड हॉस्पिटलमध्ये नेण्यात आले, परंतु त्यांचे आणि त्यांच्या बाळाचे प्राण वाचवता आले नाहीत. अपघातानंतर आरोन पपाझोग्लूला पोलिसांनी शनिवारी सकाळी अटक केली. तो सध्या प्रोव्हिजनल लायसन्सवर (तात्पुरता परवाना) गाडी चालवत होता. त्याच्यावर धोकादायक वाहन चालवण्याची पद्धत, निष्काळजीपणामुळे मृत्यू आणि गर्भातल्या बाळाच्या मृत्यूला कारणीभूत ठरणे असे गंभीर गुन्हे दाखल करण्यात आले आहेत.
समन्विता धरेश्वर या मूळच्या कर्नाटकच्या असल्याची माहिती समोर आली आहे. त्या सिडनीमध्ये IT क्षेत्रात काम करत होत्या. त्यांचे पती विनीत हे देखील टेक क्षेत्रात कार्यरत आहेत. दोघांनी नुकतेच Grantham Farm भागात घरासाठी जागा घेतली होती आणि दोन मजली घर बांधण्यासाठी अर्जही केला होता. न्यू साउथ वेल्स पोलिसांच्या म्हणण्यानुसार, रात्री 8 वाजल्यानंतर पादचारीला कारने धडक दिल्याची माहिती मिळताच आपत्कालीन सेवा घटनास्थळी पोहोचल्या.
पोलिसांच्या निवेदनात सांगितले की, समन्वितांवर सुरुवातीला जागीच उपचार करण्यात आले, मात्र त्यांच्या स्थिती गंभीर असल्याने त्यांना रुग्णालयात नेण्यात आले. तेथे त्यांचा आणि त्यांच्या जन्म न घेतलेल्या बाळाचा मृत्यू झाला. BMW आणि Kia या दोन्ही वाहनांचे चालक सुरक्षित असून त्यांना कोणतीही दुखापत झाली नाही, असे पोलिसांनी स्पष्ट केले.
