कर्नाटकामधील कलबुर्गी येथे एका होमिओपॅथिक महाविद्यालयात अंतर्गत परीक्षेदरम्यान घडलेली घटना सध्या चर्चेचा विषय ठरली आहे. नियमित लेखी परीक्षेत कॉपी करताना पकडलेल्या विद्यार्थ्याने संतापाच्या भरात थेट प्राध्यापकांवर हल्ला केल्याचा प्रकार समोर आला आहे. या संपूर्ण घटनेचे दृश्य परीक्षागृहातील सीसीटीव्ही कॅमेऱ्यात कैद झाले आहे. होमिओपॅथी विषयाच्या पेपरदरम्यान निरीक्षक म्हणून कार्यरत असलेल्या सहाय्यक प्राध्यापकांनी एका विद्यार्थ्याला मोबाईलच्या माध्यमातून उत्तरे पाहताना पकडले. त्यांनी संबंधित विद्यार्थ्याची उत्तरपत्रिका ताब्यात घेत त्याला परीक्षागृहाबाहेर जाण्यास सांगितले. याच वेळी वातावरण अचानक तणावपूर्ण झाले.
प्राध्यापकांच्या कारवाईमुळे संतप्त झालेल्या विद्यार्थ्याने त्यांच्यावर शारीरिक हल्ला केल्याचे दिसून आले. इतर विद्यार्थ्यांनी तात्काळ हस्तक्षेप करून परिस्थिती नियंत्रणात आणण्याचा प्रयत्न केला. काही क्षण तो बाहेर गेला, मात्र पुन्हा परत येत त्याने आक्रमक वर्तन केल्याचे व्हिडिओत स्पष्ट दिसते.या घटनेनंतर महाविद्यालय प्रशासनाने तातडीने विद्यार्थ्याच्या पालकांना माहिती दिली. तसेच संबंधित विद्यार्थ्याला पुढील सर्व परीक्षांमधून निलंबित करण्याचा निर्णय घेण्यात आला आहे. घटनेचे ठोस पुरावे सीसीटीव्हीमध्ये उपलब्ध असले तरी, संबंधित प्राध्यापकांनी अद्याप पोलिसांत अधिकृत तक्रार दाखल केलेली नाही.
