दक्षिण कोरियातील डेझॉन शहरात असलेल्या एका ऑटो पार्ट्स कारखान्यात भीषण स्फोटानंतर लागलेल्या आगीत मोठी दुर्घटना घडली आहे. या आगीत आतापर्यंत 10 जणांचे मृतदेह सापडले असून किमान 59 जण जखमी झाले आहेत. तसेच चार कामगार अद्याप बेपत्ता असल्याची माहिती अधिकाऱ्यांनी दिली आहे. या घटनेमुळे परिसरात मोठी खळबळ उडाली आहे.
दक्षिण कोरियाच्या अंतर्गत व्यवहार आणि सुरक्षा मंत्रालयाच्या माहितीनुसार जखमींपैकी 25 जणांची प्रकृती गंभीर आहे. मात्र त्यापैकी कोणीही गंभीर अवस्थेत आहे का, याबाबत अद्याप अधिकृत पुष्टी करण्यात आलेली नाही. शुक्रवारी दुपारी लागलेल्या या भीषण आगीवर नियंत्रण मिळवण्यासाठी 500 हून अधिक अग्निशमन दलाचे कर्मचारी, पोलिस आणि आपत्कालीन पथके तातडीने घटनास्थळी दाखल झाली.
घटनास्थळावरून समोर आलेल्या व्हिडिओ आणि छायाचित्रांमध्ये कारखान्याच्या परिसरातून दाट करडा धूर उसळताना दिसत होता. काही कामगारांनी जीव वाचवण्यासाठी इमारतीच्या वरच्या मजल्यांवरून उड्या मारल्याचेही दिसून आले. त्यामुळे काही जण जखमी झाले, तर अनेकांना धूरामुळे त्रास झाल्याची माहिती अधिकाऱ्यांनी दिली.
डेझॉन शहरातील डेडॉक जिल्ह्याचे अग्निशमन प्रमुख डुक-वू यांनी सांगितले की, स्फोटानंतर लागलेल्या आगीमुळे कारखान्याची इमारत मोठ्या प्रमाणात जळून खाक झाली. इमारत कोसळण्याची शक्यता असल्याने सुरुवातीला अग्निशमन दलाला आत प्रवेश करता आला नाही. त्यामुळे प्रथम मानवरहित अग्निशमन रोबोटांच्या मदतीने इमारत थंड करण्यात आली आणि सुरक्षेची तपासणी केल्यानंतरच बेपत्ता कामगारांचा शोध सुरू करण्यात आला.
ही आग शुक्रवारी दुपारी सुमारे 1 वाजून 18 मिनिटांच्या सुमारास लागल्याची नोंद आहे. आगीचे नेमके कारण अद्याप स्पष्ट झाले नसले, तरी स्फोटानंतर आग वेगाने पसरल्याचे प्रत्यक्षदर्शींनी सांगितले. आग शेजारील कारखान्यात पसरू नये यासाठी अग्निशमन दलाने विशेष प्रयत्न केले. तसेच घटनास्थळावरून सुमारे 100 किलोहून अधिक अत्यंत प्रतिक्रियाशील रसायने सुरक्षितपणे हटवण्यात आली.
या बचाव आणि अग्निशमन मोहिमेसाठी सुमारे 120 वाहने आणि विविध उपकरणे तैनात करण्यात आली होती. त्यामध्ये अग्निशमन विमाने, मानवरहित वॉटर कॅनन वाहन तसेच दुर्गम भागात काम करणारे दोन अग्निशमन रोबोट यांचा समावेश होता. दरम्यान, दक्षिण कोरियाचे राष्ट्राध्यक्ष ली जे-म्युंग यांनी परिस्थितीवर नियंत्रण मिळवण्यासाठी सर्व यंत्रणा आणि साधनसामग्री पूर्ण क्षमतेने वापरण्याचे निर्देश दिले आहेत.
