मुंबई: भारतीय शेअर बाजाराने आठवड्याच्या पहिल्याच दिवशी अस्थिरतेची चिन्हे दाखवली. आज सोमवारी, 6 एप्रिल 2026 रोजी सकाळी बाजाराने हिरव्या निशाणावर सुरुवात केली असली, तरी काही मिनिटांतच विक्रीचा दबाव वाढला आणि निर्देशांक घसरले. BSE Sensex 377 अंकांनी घसरून 72,942 वर आला, तर Nifty 50 66 अंकांच्या घसरणीसह 22,642 च्या पातळीवर पोहोचला.
सुरुवातीला मात्र बाजारात सकारात्मक वातावरण होते. प्रारंभीच्या व्यवहारात सेन्सेक्स 157 अंकांनी वाढून 73,477 वर गेला होता, तर निफ्टीनेही 67 अंकांची वाढ नोंदवत 22,723 वर व्यवहार सुरू केला. मात्र, जागतिक संकेत आणि गुंतवणूकदारांच्या सावध भूमिकेमुळे बाजारात लवकरच घसरण सुरू झाली.
आशियाई बाजारांचा कल मिश्र राहिला. जपानचा निक्केई 225 निर्देशांक 0.62 टक्क्यांनी वधारला, तर टॉपिक्समध्येही वाढ दिसली. दक्षिण कोरियाचा कोस्पी निर्देशांक 1.8 टक्क्यांनी वाढला आणि कोस्डॅकनेही जवळपास एक टक्क्यांची उसळी घेतली. मात्र, ऑस्ट्रेलिया, न्यूझीलंड आणि हाँगकाँगमध्ये इस्टर सुट्ट्यांमुळे व्यवहार बंद होते, तर चीन आणि तैवानमध्ये ‘चिंगमिंग’ सणामुळे बाजार बंद राहिले.
अमेरिकन बाजारातूनही नकारात्मक संकेत मिळाले. पश्चिम आशियातील वाढत्या तणावामुळे आणि कच्च्या तेलाच्या दरवाढीमुळे अमेरिकन फ्युचर्समध्ये घसरण दिसली. डाऊ जोन्स फ्युचर्स 0.5 टक्क्यांनी घसरले, तर एस अँड पी 500 आणि नॅस्डॅक-100 फ्युचर्समध्ये अनुक्रमे 0.6 आणि 0.7 टक्क्यांची घट झाली.
दरम्यान, कच्च्या तेलाच्या किमतीत वाढ होताना दिसत आहे. वेस्ट टेक्सास इंटरमीडिएट क्रूड 111 ते 114 डॉलर प्रति बॅरल दरम्यान व्यवहार करत आहे, तर ब्रेंट क्रूडही 110 डॉलरच्या पुढे गेला आहे. या वाढत्या दरांचा थेट परिणाम जागतिक बाजारावर आणि भारतीय अर्थव्यवस्थेवर होण्याची शक्यता व्यक्त केली जात आहे.
चलन बाजारातही हालचाली दिसून आल्या. यूएस डॉलर इंडेक्स 0.18 टक्क्यांनी वाढून 100.21 वर पोहोचला. दुसरीकडे, भारतीय रुपया अलीकडेच मजबूत होत 93.10 प्रति डॉलर या पातळीवर बंद झाला होता. एकूणच, जागतिक घडामोडींच्या पार्श्वभूमीवर भारतीय शेअर बाजारात अस्थिरता कायम राहण्याची शक्यता आहे.
(Disclaimer: शेअर बाजारातील गुंतवणूक जोखमीची आहे. नियम व अटी काळजीपूर्वक वाचा. जय महाराष्ट्र न्यूज कोणत्याही नफ्या-तोट्यास जबाबदार नाही. गुंतवणुकीपूर्वी तज्ज्ञांचा सल्ला घ्या!)
