पश्चिम बंगालमधील दौऱ्यावर असलेल्या पंतप्रधान नरेंद्र मोदी (Narendra Modi) यांच्या हेलिकॉप्टरला दाट धुक्यामुळे ठरलेल्या ठिकाणी उतरता आले नाही. शनिवारी सकाळी ताहरपूर (Taherpur) हेलिपॅडवर उतरण्याचा प्रयत्न करण्यात आला, मात्र कमी दृश्यमानता (Low Visibility) असल्याने हेलिकॉप्टर काही काळ हवेत घिरट्या घालून पुन्हा कोलकाता विमानतळाकडे (Kolkata Airport) परतले, अशी माहिती अधिकृत सूत्रांनी दिली.
या घटनेदरम्यान कोणतीही अनुचित घटना घडलेली नाही, असे स्पष्ट करण्यात आले आहे. पंतप्रधानांचे हेलिकॉप्टर सुरक्षितपणे कोलकात्यात परतले असून, पुढील हवामान परिस्थितीबाबत माहिती मिळेपर्यंत पंतप्रधान विमानतळावरच थांबले होते. रस्तेमार्गे जाणे किंवा हवामान सुधारल्यास पुन्हा हवाई मार्गाने जाण्याबाबत निर्णय घेतला जाणार होता.
याआधी सकाळी सुमारे 10.40 वाजता पंतप्रधान मोदी कोलकात्यात दाखल झाले होते. तेथून ते हेलिकॉप्टरने पश्चिम बंगालमधील नादिया (Nadia) जिल्ह्यातील ताहरपूरकडे रवाना झाले होते. येथे त्यांच्या उपस्थितीत प्रशासकीय कार्यक्रम आणि भारतीय जनता पक्षाची (BJP) ‘परिवर्तन संकल्प सभा’ (Parivartan Sankalpa Sabha) आयोजित करण्यात आली होती.
हेही वाचा: Barack Obama: बराक ओबामांसुद्धा माऊलींच्या पसायदानाची भुरळ
या दौऱ्यादरम्यान पंतप्रधानांच्या हस्ते पश्चिम बंगालमधील सुमारे 3200 कोटी रुपयांच्या विकास प्रकल्पांचे उद्घाटन अपेक्षित होते. यामध्ये राष्ट्रीय महामार्ग 34 (National Highway 34) वरील बाराजगुली-कृष्णनगर (Barajaguli-Krishnanagar) या 66.7 किलोमीटर लांबीच्या चार पदरी रस्त्याचा समावेश आहे. तसेच बारासात-बाराजगुली (Barasat-Barajaguli) या विभागाच्या चार पदरीकरणासाठी भूमिपूजन करण्यात येणार होते. या प्रकल्पांमुळे कोलकाता आणि सिलीगुडी (Siliguri) यांच्यातील संपर्क अधिक सुलभ होणार आहे.
दरम्यान, रानाघाट (Ranaghat) येथील नेताजी पार्क परिसरात मोठ्या संख्येने नागरिक पंतप्रधानांच्या स्वागतासाठी जमा झाले होते. हातात राष्ट्रीय ध्वज घेऊन आणि ‘मोदी, मोदी’च्या घोषणा देत नागरिक उत्साहात सहभागी झाले होते. मात्र, धुक्यामुळे कार्यक्रमाच्या वेळापत्रकात बदल होण्याची शक्यता निर्माण झाली.
पश्चिम बंगालमधील कार्यक्रमानंतर पंतप्रधान मोदी आसाम (Assam) दौऱ्यावर जाणार असून, 20 आणि 21 डिसेंबरदरम्यान गुवाहाटी (Guwahati) आणि नामरूप (Namrup) येथे विविध विकास प्रकल्पांचे उद्घाटन, सार्वजनिक सभा आणि कार्यक्रमांना उपस्थित राहणार आहेत. या पार्श्वभूमीवर संबंधित राज्यांमध्ये कडक सुरक्षा व्यवस्था तैनात करण्यात आली आहे.
