सध्या विमान अपघातांच्या घटनांमध्ये मोठ्या प्रमाणात वाढ होत आहे. सध्या ब्राझीलमधून एक मोठी बातमी येत आहे. एक छोटे विमान अचानक एका इमारतीला धडकले. हा अपघात ब्राझीलच्या बेलो होरिझोंटे परिसरात घडला. अपघातानंतर लगेचच बचाव आणि मदतकार्य सुरू करण्यात आले आहे. मिळालेल्या माहितीनुसार, विमानातील पायलट आणि को-पायलट यांचा मृत्यू झाला आहे.
मिळालेल्या माहितीनुसार, विमानात असलेले इतर तीन जण जखमी झाले. सुदैवाने, इमारतीच्या आत कोणीही जखमी झाले नाही. अधिकाऱ्यांच्या म्हणण्यानुसार, विमानाने इमारतीच्या जिन्याला धडक दिली. ब्राझीलमधील प्रमुख शहर असलेल्या बेलो होरिझोंटे येथे सोमवारी हा अपघात घडला. एक छोटे विमान एका निवासी इमारतीवर कोसळले. या अपघातात पायलट आणि को-पायलट यांचा मृत्यू झाला, तर विमानातील तीन प्रवासी गंभीर जखमी झाले, असे अग्निशमन अधिकाऱ्यांनी सांगितले. मिनास गेराईस राज्यातील अग्निशमन विभागाने सांगितले की, इमारतीमधील कोणालाही दुखापत झाली नाही आणि इमारत कोसळण्याचा प्रकार घडला नाही.
अपघातानंतर, विमानातील तीन गंभीर जखमी प्रवाशांना रुग्णालयात दाखल करण्यात आले. सर्व जखमींवर सध्या उपचार सुरू आहेत. मिळालेल्या माहितीनुसार, विमानाने इमारतीच्या जिन्याला धडक दिली. अग्निशमन दलाने प्रसिद्ध केलेल्या छायाचित्रांमध्ये बचाव पथक रहिवाशांना इमारत रिकामी करण्यास मदत करत असल्याचे दिसत आहे. या अपघातामुळे मोठे नुकसान होऊ शकले असते, परंतु सुदैवाने, आतील व्यक्ती अपघातातून सुखरूप बचावल्या.
काही दिवसांपूर्वीच, अमेरिकेतील टेक्सासमध्ये एक छोटे विमान कोसळले, ज्यात विमानातील सर्व पाच जणांचा मृत्यू झाला. हेस काउंटीचे न्यायाधीश रुबेन बेसेरा यांनी फेसबुक पोस्टमध्ये लिहिले आहे की, हा अपघात गुरुवारी रात्री ऑस्टिनच्या नैऋत्येस सुमारे 40 मैल (64 किलोमीटर) अंतरावर असलेल्या विम्बर्ली येथे झाला. फेडरल एव्हिएशन ॲडमिनिस्ट्रेशनने (FAA) सांगितले की, सेसना 421सी हे विमान रात्री सुमारे 11.25 वाजता कोसळले, ज्यात पाच जण होते.
