‘इंडियाज गॉट लेटेंट’ या लोकप्रिय शोमध्ये झालेल्या वादग्रस्त घटनेनंतर, राष्ट्रीय महिला आयोगाने (NCW) रणवीर अल्लाहबादिया आणि शोचा होस्ट समय रैनाला हजर राहण्याचे आदेश दिले आहेत. या शोमध्ये अल्लाहबादिया यांनी एका स्पर्धकाला विचारलेल्या अश्लील प्रश्नामुळे वाद निर्माण झाला होता. या घटनेनंतर, शोचे सर्व एपिसोड्स यूट्यूबवरून हटविण्यात आले.
या घटनेवर नेटिझन्सनी तीव्र प्रतिक्रिया व्यक्त केल्या आहेत. काहींनी या प्रकरणावर टीका करताना, राष्ट्रीय महिला आयोगाने खऱ्या आणि गंभीर मुद्द्यांवर लक्ष केंद्रित करावे, अशी मागणी केली आहे. त्यांच्या मते, अशा प्रकरणांवर वेळ आणि संसाधने खर्च करण्यापेक्षा, महिलांच्या सुरक्षेशी संबंधित गंभीर समस्यांवर अधिक लक्ष दिले पाहिजे.
जय महाराष्ट्र न्यूजच्या थेट संपर्कात राहण्यासाठी व्हॉट्सअप चॅनेल वर क्लिक करा.
समय रैनाने या वादानंतर सोशल मीडियावर प्रतिक्रिया देत, “जे काही घडत आहे, ते माझ्यासाठी सांभाळणे खूप कठीण आहे. मी ‘इंडियाज गॉट लेटेंट’ चे सर्व व्हिडिओ माझ्या चॅनेलवरून हटवले आहेत. माझा एकमेव उद्देश लोकांना हसवणे आणि त्यांच्यासोबत चांगला वेळ घालवणे हा होता. मी सर्व एजन्सींशी पूर्ण सहकार्य करेन, जेणेकरून त्यांच्या चौकशा निष्पक्षपणे पूर्ण होऊ शकतील.” असे म्हटले आहे.
या प्रकरणामुळे सोशल मीडियावर विविध प्रतिक्रिया उमटत आहेत. काही लोकांनी शोच्या सामग्रीवर टीका केली आहे, तर काहींनी या प्रकरणाच्या हाताळणीवर प्रश्न उपस्थित केले आहेत. राष्ट्रीय महिला आयोगाच्या या कारवाईनंतर, या प्रकरणाचा पुढील विकास कसा होतो, याकडे सर्वांचे लक्ष लागले आहे.
