दिल्लीतील जंतरमंतर येथे सुरू असलेल्या विद्यार्थी आंदोलनाच्या पार्श्वभूमीवर सोशल मीडियावर एक पोस्ट मोठ्या प्रमाणात व्हायरल झाली. नागालँडमधील एका तरुणाने आंदोलनकर्त्यांसाठी 150 पिझ्झा आणि इतर खाद्यपदार्थ पाठवल्याचा दावा करत त्याचे बिलही सोशल मीडियावर शेअर केले. या पोस्टनंतर अनेकांनी त्याच्या मदतीचे कौतुक केले आणि पोस्ट मोठ्या प्रमाणात शेअर करण्यात आली.
पोस्टमध्ये संबंधित तरुणाने आपण आंदोलनस्थळी प्रत्यक्ष उपस्थित राहू शकत नसल्यामुळे आंदोलनकर्त्यांना पाठिंबा दर्शवण्यासाठी ही मदत केल्याचे नमूद केले होते. त्याने पिझ्झा आणि बिस्किटे पाठवल्याचा दावा करत त्यासाठी मोठी रक्कम खर्च केल्याचेही सांगितले. त्यामुळे ही पोस्ट काही तासांतच सोशल मीडियावर चर्चेचा विषय बनली.
मात्र, पोस्ट व्हायरल झाल्यानंतर अनेक नेटिझन्सनी त्यातील बिल आणि ऑर्डरबाबत शंका उपस्थित केल्या. त्यानंतर संबंधित तरुणाने स्वतःच सोशल मीडियावर स्पष्टीकरण देत व्हायरल झालेले बिल वास्तविक नसल्याचे मान्य केले. या कृतीमुळे लोकांची दिशाभूल झाली असल्याची कबुली देत त्याने सर्वांची जाहीर माफी मागितली.
त्याने आपल्या स्पष्टीकरणात आंदोलनाला पाठिंबा मिळावा आणि लोकांनी विद्यार्थ्यांना मदत करण्यासाठी पुढे यावे, हा उद्देश असल्याचे सांगितले. मात्र चुकीची माहिती शेअर करणे योग्य नसल्याचे मान्य करत त्याने आपल्या कृत्याबद्दल खेदही व्यक्त केला.या घटनेनंतर सोशल मीडियावर विविध प्रतिक्रिया उमटल्या. काहींनी त्याच्या हेतूवर टीका केली, तर काहींनी कोणतीही माहिती किंवा दावा पडताळणी केल्याशिवाय शेअर करू नये, असा सल्ला दिला. या प्रकरणामुळे सोशल मीडियावर व्हायरल होणाऱ्या माहितीची सत्यता तपासण्याची गरज पुन्हा एकदा अधोरेखित झाली.
